هەرچەندە حاڵەتی خەمۆکی لە خانماندا زیاترە، بەڵام ئەم حاڵەتە لە هەردوو ڕەگەزدا دەبینرێت، بەو جیاوازییەی، نیشانەکان لە خانمان و پیاواندا جیاواز دەردەکەون، واتە ئاکار و هەڵسوکەوتەکان لە کاتی خەمۆکیدا جیاوازن.
توێژەرانی دەروونناسیی بەریتانی لە لێکۆڵینەوەیەکی مەیدانیدا جیاوازییەکانیان بۆ دەرکەوت و بەم شێوەیە پەردەیان لەسەر جیاوازییەکان هەڵداوە:
-ژنی خەمۆک زیاتر سەرکۆنە و سەرزەنشتی خۆی دەکات، لە حاڵێکدا پیاوی خەمۆک زیاتر سەرکۆنەی بنەماڵە، یاخود نزیکەکانی دەکات.
-ژنان لە کاتی خەمۆکیدا زیاتر لە سووچێکی بێدەنگ دادەنیشن و خۆیان بەدوور دەگرن لە درووستکردنی کێشە، بەڵام پیاوی خەمۆک شەڕفرۆش دەبێت و بەهۆی نەخۆشییەکەیەوە کێشە دەنێتەوە.
-ژنان لە قۆناغی خەمۆکیدا پێیان خۆشە لەسەر کێشەکان و هەستەکانیان لەگەڵ کەسانی دیکە بکەونە قسەکردن و ئاخافتن، بەپێچەوانەوە، پیاوان ئەم کارە ناکەن و سەبارەت بەم بابەتە بێدەنگ دەبن.
-زۆربەی ژنان لەم قۆناغەدا حەزیان لە پەیوەندیی دۆستانە و ڕۆمانسییانەیە، بەڵام زۆربەی پیاوانی خەمۆک لە کاتی حاڵەتی خەمۆکیدا سەیری تیڤی دەکەن، یان هەوڵ دەدەن بابەتەکە فەرامۆش بکەن، یا لە ڕێگەی وەرزشکردنەوە خۆیان سەرقاڵ دەکەن و کەمتر باسی کێشەکانیان دەکەن. [1]