زرێبار
لە پەڕ شاری مەریوان
دوو چین کێوی سەوز و جوان
راوەستاون بەرانبەر
بەرز و دارستان لە سەر
لە داوێن ئەو کێوانا
لە ژێر تاقی ئاسمانا
گۆمێکی جوان وەستاوە
کە (زرێبار)ی ناوە
کێوان سەوز و دڵنشین
ئاسمان و ئاو هەر دوو شین
زرێبار و بەهاری
بەهەشتی کوردەواری
لە نێو دارستان قەراخ
باڵندەکان شاخ بە شاخ
کۆ دەبن و یەک دەگرن
ئاسمانی سەر ئاو دەبڕن
لە ژێر تیشکی هەتاوا
لە سەر ئاوێنەی ئاوا
وێنەی خۆیان دەبینن
مەست دەبن و ئەخوێنن:
زرێبار و بەهاری
بەهەشتی کوردەواری
شنەی بەیانی بەهار
ئەدا لە سەر زرێبار
کاتێ کە بووکی هەتاو
تیشکی ئەخاتە سەر ئاو
وێنەی کراسی کیژی کورد
کە شەماڵ لێیدا ورد ورد
شەپۆلی جوان و زێڕین
دەڕژێتە سەر ئاوی شین
بەرەو چیمەن و گوڵزار
رێ دەکەون بۆ لێوار
بەرانبەر بووکی هەتاو
کیژی زێڕینی هەتاو
لەو کاتی بەربەیانە
شادی و سەمایانە
ئەڵێن شەپۆلی قەراخ
دەنگیان ئەڕوا شاخ بە شاخ:
زرێبار و بەهاری
بەهەشتی کوردەواری
#شەریف حسێن پەناهی#
#ملوانکەی شین# [1]
Ev babet bi zimana (کوردیی ناوەڕاست) hatiye nvîsandin, klîk li aykona
bike ji bu vekirina vî babetî bi vî zimana ku pî hatiye nvîsandin!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Ev babet 918 car hatiye dîtin