ناو: هاشم
نازناو: نانەوازادە
ناوی باوک: ساڵح
ناوی دایک: فاتم موڵازادەگان
رۆژی لەدایکبوون: 1928
رۆژی کۆچی دوایی: 1993
شوێنی لەدایکبوون: مەهاباد
شوێنی کۆچی دوایی: مەهاباد
شاعیری گەورە مامۆستا هاشم نانەوازادە کوڕی ساڵح و یای فاتم موڵازادەگان لە ساڵی 1928 لە شاری مەهاباد لە دایک دەبێ. وەک دەگوترێ ئەسڵ و بنەچەیان دەگەڕێتەوە بۆ شاری موسڵ و لە سەردەمی بوداق سوڵتان ڕا باوانی هاتوونەتە مەهاباد و ئیتر هەر لەوێ نیشتەجێ بوون. مامۆستا هاشم لە تەمەنی 6 ساڵیدا باوکی لەدەست دەدات و بێ باوک دەمێنێتەوە. لە ئامێزی مامەکانیدا گەورە دەبێت و وەبەر خوێندنی دەنێن. بە هۆی گرفتی ژیان نەیتوانیوە لە پۆلی شەش زیاتر بخوێنە و ئیتر لە دوای ئەوە مل لە کار و کاسبی دەنێ. لە منداڵییەوە خوولیای نیگارکێشان بوو و دەستێکی باڵای لەو هونەرەدا هەبوو. تا ئێستا تەنیا تابڵۆکانی مامۆستا هاشم نانەوازادەیە کە بە کۆنترین تابڵۆکانی ڕەنگ و ڕۆن لە مەهاباد ئەژماردە دەکرێ. ئەو هۆزانە شاعیرێکی لێزان و بە هەست بوو. زیاتر لە 40 هۆنراوەی بۆ گۆرانییەکانی مامۆستا محەممەدی ماملێ داناوە کە بەناوبانگترینیان: لالە بەدەستان، یادی بەخێر، مەجنون لەبەرچی وا دەکەی، عەزیزم بەیانی و هتدە کە کەم کورد هەیە نەیانبیستبێت و ڕۆژانە نەبووبێتە وێردی زمانیان. ئەو مامۆستا بەرزە گەر نەڵێین لە گشت کوردستان بەڵام بە دڵنیاییەوە دەتوانین بڵێین کە تەنیا هۆزانێک بووە کە لە موکریان و ڕۆژهەڵاتی کوردستان، هۆنراوەی بۆ قالبی گۆرانی داناوە کە لە زمانی فارسیدا پێیدەگوترێ (ترانەسرا). بەڕێزیان هاوکات وەرزشوانێکی شاخەوانی و عاشقێکی سەرسەختی سرووشتی کوردستان بووە کە ئەو خۆشەویستییەیان بۆ سرووشتی کوردستان هەم لە تابڵۆکانیدا و هەم لە شێعرەکانیدا بەوپەڕی جوانییەوە ڕەنگی داوەتەوە و شێعرەکانی وەک ئینسکلۆپێدیایەکی دەوڵەمەند دەنرخێ کە لە زۆرەترین ناوی ڕوەک و گیان و گوڵی کوردستانی پێک هاتووە، ئەوە جگە لە یادکردنەوەی کۆمەڵێک داب و نەریتی کوردەواری و ناوهێنانی زۆربەی کێو و مەڵبەند و ناوچەی کوردستان. لە ساڵی 1992 بە هیمەتی کاک پۆڵای کوڕە گەورەی ئەو هونەرمەندە، کۆی هۆنراوەکانی مامۆستا هاشم لە کتێبێکدا چاپ و بڵاو کرایەوە بە ناوی (لالە بەدەستان). ئەو شاعیرە و هونەرمەندە گەورەیەی کورد لە ساڵی 1993 لە شاری مەهاباد کۆچی دوایی دەکات و تەرمی پیرۆزیان لە گۆڕستانی بوداق سوڵتانی ئەو شارە بە خاک دەسپێردرێ. [1]
Ev babet bi zimana (کوردیی ناوەڕاست) hatiye nvîsandin, klîk li aykona
bike ji bu vekirina vî babetî bi vî zimana ku pî hatiye nvîsandin!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Ev babet 1,203 car hatiye dîtin