لەساڵی 1890 لەدیبەگە لەدایکبووەو لە زووەوە لەگەڵ بنەماڵەکەیدا لە کۆیێ بۆ کەندێناوە کۆچیان کردووە، هەر لە منداڵیەوە کەسێکی سەرکێشو بزێوو چاوکراوە بووەو باوەڕی بەخۆی هەبووە لەگەڵ ئەوەی نەخوێندەوار بووە، بەڵام بیرتیژو دووربین بووەو لەقۆناغەکانی ژیانیدا سێ جار ژنی هێناوە لە ژنی دووەمو سێیەمی چەند کوڕێکی بەناوی (سوارەو کاخدرو کانەبیو عەلیو مامەندو عومەر، دوو کچیشی بەناوی عەیشێو زبیدە) هەبووەو لەناو ئەوانەشدا تەنها سوارەو مامەند لەژیاندا ماون.
حەمەد کوردە هەمیشە سڵی لەوە نەکردۆتەوە لەبەرامبەر نەیارەکانی نزمی بنوێنێ، بۆیە هەمیشە چەکی لەدەست و دەورەدابووە بۆ پاراستنی خۆیو خانەوادەکەشی خانوویەکی گەورەی لەسەرشێوەی قەڵا لەسەر ڕووبەری 1500 مەتر دووجا بنیات ناوەو لەچوار لادا قوللە (قولغە)ی پاسەوانیو چاودێری هەبووە.
لەبواری کشتوکاڵیشدا خاوەنی چەندین دۆنم زەوی کشتوکاڵی بووەو خۆشی بەشداری لە جووت و دروێنەدا کردووەو لەبەرئەوەش بووە لەسەردەمی کێشەی موڵکداری لەناوچەکە تەنازولی لەسەر بستێک زەوییەکانی بۆ دەرەبەگەکان لەوسەردەمەدا نەکردووەو لەبەرئەوەش دەرەبەگەکان بەربەرەکانیانیان کردووە، بەڵام ئەوەش دادی نەداونو حەمەد کوردە لەبەردەمیاندا بەرەنگاری کردووەو تووشی کێشەی زۆربۆتەوە.
لەوبارەیەوە "مام سوارە"ی کوڕە گەورەی حەمەد کوردە باس دەکات و ئەوەندەی لەبیری دایەو کاتێک ئەو تەمەنی بچوک بووە باوکی کۆچی دوایی کردووە، دەڵێت: باوکم پیاوێکی مامناوەندی بەژن ئاسایی بووە بەڕادەیەک توندوتیژبووەو حوکمی خۆی لەسەر خێزانەکەمانو خزمەکانیشماندا ڕۆیشتووە، هەروەها دەڵێت: ئاشنایەتی بەدەنگی لاوکو حەیراندا هەبووە سەرمەست بووە بەلاوکو داستانی قارەمانییەتی لاوچاکانداو بۆ خۆشی خۆشی لاوکو حەیرانی گووتوە.
لەبواری کۆمەڵایەتیدا کەسایەتییەکی خاوەن هەڵوێست بووەو پەناگەی لێقەوماوان بووەو پەنای داونو لەمەترسی پاراستوونی خاوەنی دیوەخانی خۆی بووەو لەگەڵ پیاوانی هاوسەردەمو هاوتەمەنی خۆشیدا پیاوێکی قسە خۆشو بەسوعبەت بووە. بەوپێیەی ماڵەکەی لەپەراوێزی شارۆچکە یان گوندی دیبەگە بووە زۆر حەزی بە دەشت ودەر کردووەو هەر لەنزیک کێڵگەکانی خۆیەوە بەنداوێکی دروستکردووە بۆ گلدانەوەی ئاوی بارانو ساڵانە لەوەرزی زستانو بەهاردا تاکو هاوین سوودی لەو بەنداوە وەرگرتووە بۆ ئاوی خواردنەوەو ماڵات نەوەک هەر بۆخۆی بەڵکو بۆ خەڵکیش، ئەم بەنداوەش تاکو سەرەتای ڕاگواستنی دیبەگە شوێنەواری ماوەو تەنانەت ئاوی تێدا کۆبوبۆوەو بە گۆمی حەمەد کوردە ناسراوبوو.
لە ڕووی نیشتمانپەروەرییەوە حەمەد کوردە هەر لەسەرەتاوە کەسێکی کوردپەروەرو نیشتمان پەروەر بووەو هەواداری بزوتنەوەی مەلیکی کوردستان "شێخ مەحمودی نەمر" بووەو پشتیوانێکی شۆڕشەکەی شێخی کردووەو لەبەر ئەم هەڵویستانەشی لەناوچەکەدا کەسێکی خۆشەویست بووە.
ئەم پیاوە لەساڵی 1935 بەنەخۆشی لەنەخۆشخانەکانی بەغدا کۆچی دوایی دەکات، هەر لە گۆڕستانێکی ئەو شارەش دەنێژرێت، هەزاران ڕەحمەت لەگیانی پاکی حەمەد کوردە.
ئەوەی ماوە لەسەر ئەم پیاوە بیڵێین چەندین بیرەوەرین لەنێو هاوڕێکانیو نەوەکانی ئەم پیاوە ماوەو زۆرجاریش وەکو سونبوڵی پیاوماقولیو ئازایەتی جەربەزەیی دژی دەرەبەگو پشتیوانی جووتیاران لەوناوچەیە ئاماژەی بۆ دەکرێت.