پرسی ڕەسەنێتی
#ئامانج غازی#

پەیوەندی مرۆڤ لەگەڵ ژینگەکەی یان ئەو شوێنەی کە تێیدا دەژی لە سادەترین فۆڕمی خۆیدا نموونەیەکی ناوازەی سەر بە سرووشتە، کە ئێمە ئاشناوسەرسام دەکات و ئەمەش لە هەڵس وکەوتەکانماندا بە پشتبەستن بە هەندێک لایەنی سرووشتەوە نوێنەرایەتی دەکرێت کە لەبنەچەدا ئامادەکراوو پێکهاتەی ژینگەیین ، بۆیە ئەم بابەتە زیندووە بە ناوەرۆکێکی هونەری و بنەڕەتی دەزانرێت، جگە لەوە دەربڕینی پەیوەندی مرۆڤەکان لەگەڵ یەکتردا لە شوێنێک کە پانتایی میراتی شارستانی تێدا بەرجەستە بووە، بوەتە بەشێک لە پەیوەندی کات و شوێنی کەلەپووری کولتووری خۆی و هەمیشە ئەو ڕاستییەش پشتڕاست دەکاتەوە کە: داڕشتنی ژینگە، بە مانا سرووشتی یان جوگرافییەکەی، بە شێوەیەکی سەرەکی لە هونەردا، کاریگەریی هۆکارەکانی ژینگە و کەشوهەوا لەسەر سەلیقە و داهێنەری مرۆڤەکان بەجێدێڵێت.
کەواتە کەڵتوور کاریگەرییەکی زۆری هەیە لەسەر دەربڕینی هونەرمەند سەرەڕای ئەوەی یەکێکە لە بناغە سەرەکییەکانی گەشەی کۆمەڵایەتی و ڕەنگدانەوەی لە ڕێگەی ئەو گۆڕانکارییانەی لە حەزوخولیا وخەیاڵییەکاندا درووست دەبن بەهۆی ئەو ڕەوت و هێڵە لۆژیکییانەی کە لە پەرەسەندنی ستایلە هونەرییەکاندا هەن، هەروەها ئەمەش دەسەلمێنن کە گەشەسەندنی کۆمەڵایەتی و ڕەوتی گشتی دەتوانێت لە مێژووی هەر کۆمەڵگەیەک یان شارستانییەتێکدا بمێنێتەوەو جۆر و خێرایی گەشەکردن لەوانەیە لە ڕێگەی دەربڕینی هونەری و خاڵە دەستپێکە نوێیەکانیەوە ڕووبدات.
بۆیە پرسی ڕەسەنایەتی و کەلەپووری کولتووری وەک بابەتی گفتوگۆیەکی چڕو مشتومڕێکی نەپساوە دەمێنێتەوە، ئەمەشیان لە ڕێگەی قووڵکردنەوەی چەمکی کەلەپوور و پەیوەندییەکەی بە نوێبوونەوەوە دەبێت، هەروەها بە ھاوشێوەکردنی کەلەپوورێک کە لە چوارچێوەیەکی هاوچەرخدا دانراوە، هەروەک چۆن ڕەسەنایەتی بنەمای هاوچەرخێتییەو کەلەپووریش بە بەردەوامی نوێنەرایەتی ئاواتەکانی گەیشتن بە نوێگەریی و گونجاندنی لەگەڵ پێداویستییەکانی واقیعدا دێنێتە دی، بۆیە ناتوانرێت کەلەپوور لە واقیع جیابکرێتەوە، بەڵکوو توخمێکی گۆڕاو و گۆڕانئامێزە، وەک چۆن وەک بیروباوەڕی تیۆری جێگیر و ڕاستییە هەمیشەییەکان نییە، ڕەنگە ئەم گەڵاڵەیە لە پەیوەندیی ڕەسەنایەتی لەگەڵ نوێگەریی نوێنەرایەتی خوێندنەوەیەک دەکات لە هەوڵێکی بەردەوام بۆ هەڵبژاردنی ئەوەی کە دەتوانێت لەگەڵ پێداویستییەکانی سەردەمەکەداخۆی بگونجێنێت.[1]
تێبینی: ئەم بابەتە بە رێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!