باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و شەسس و هەشتەمە
دمای بانکەوازو ئەبوبەکری پەی ئاشکەراکەردەی دینەکەو محمەدی، ئیتر جە ناگانە قوڕەیشیەکۍ هېرششان ئاوەرد پەیشان و پەلامارەشان دێ.
ناگا موشریکان مەغلووبە کەردەن
حەملە وېنەی سەگ وە ئەسحاب بەردەن
حەزرەت تەشریف بەرد تەنها وە کاخی
ئەسحاب هەر یەک شیی وە سوراخی
مەند هەر وە تەنها سدیقی ئەکبەر
کەوت وە چنگ قەومی گومڕای کەم هونەر
عەتبە بن ئەبی ڕەبیعەی مەلعوون
نەعلەین هۊرمەگېرت، وە بۍ چەند و چوون
ئەوەند دا وە فەرق ڕوخسارش وە جەور
ڕوخساری ماهیش بیی بە سیا هەور
ڕووی موبارەکش جاریی بی جە هوون
سەرتاپای باڵاش بی بە لالە گوون
غەرەز وە بۍ هۊش ئەو شای وریا دڵ
جە ئېشی کاری زامانی پەڕ چڵ
تا ئەبو تەییم هەر بەو زامەوە
لاشەشان پېچا وە تۊی جامەوە
وە کۊڵ بەردشان بۍ هۊش وە یانە
جەم بین نە دەورش خوېش و بېگانە
ئاخر تا وە حاڵ هیلاکەش یاوا
ئەو ڕۊ بۍ هۊش بی تا کە خوراوا
ئەبو قەحافە چەنی ئومولخەیر
دەیریی بین وېنەی دەیریانی دەیر
هەردوو دەسکەردەن وە شین و زاریی
بە واوەیلای گەرم وە بۍ قەراریی
گرووی قەوم و خوېش یارانی دەکساز
ئەوەند وە سدیق کەردشان ئاواز
سیدیقی ئەکبەر تا ئاما وە دەنگ
حاڵاتش یاوا بە سەڎ هەزار ڕەنگ
واتش: سەرتاپام ئاغشتەی هوونەن
دەخیل محەمەد ئەحواڵش چوونەن
دەس گرتشان وە دەم، ڕای حەرفشان بەست
هەرکەسێ پەی وېش لېوی حەسرەت گەست
واتەن: هەنی نام محەمەد مەبەر
تایەفەی قوڕەیش مەکەرات بۍ سەر
ئومی خەیر تەعام ئاوەردبە دەو پېش
بەڵکم هەم بەیۊ بە حاڵاتی وېش
غەرەز ئومی خەیر هەرچی ئیلحاح کەرد
پەی دەرمان زەڕە جەو تەعام نەوەرد
واتش: محەمەد حاڵش چە حاڵەن
بە خوڎا من پەیش زوانم لاڵەن
ئاخېز کەر بشۊ لای بەنی خەتتاب
جە ئومی جەمیل پەیم باوەر جواب
ئومی خەیر لوا شای سوسەن خاڵان
جە ئومی جەمیل پەرسا ئەحواڵان
ئومی جەمیل وات: نەداروون خەبەر
با بشوو وە لای سیدیقی ئەکبەر
ئەو هەردوو حوری دیڎە و دڵسافە
تا شین وە یانەی ئەبو قەحافە
دییەن ئەبوبەکر خەڵتانی هوونەن
مەجرووحی تەقدیر چەرخی گەردوونەن
ئومی جەمیل وات: یەخو نامەردەن
هەر قەومێ وەی تەور ئەی کارە کەردەن
زاتی خەنزیرەن جە ئەزەڵ زاتش
خوڎای ئاسمان نەڎۊ نەجاتش
ئەبوبەکر وات: جەرگم زوخاڵەن
ڕەسوولی خودا حاڵش چە حاڵەن
ئومی خەیر واتش: ئەحواڵش خاسەن
دایېم هەر نە ویر قەسدی قەساسەن.[1]