باخچێوە بېگەرد
نویستەی: میرزا ئۆلقاڎرو پاوەی
بەشۍ: هەشتا و نۊهەمە

میرزا ئۆلقاڎرو پاوەی باس جە ژیوای محەمەد (د.خ) کەرۊن، باس جە ڕەفتارۍ زارۊڵەییش، جە سەروەختو دوە ساڵیشەنە. وەختێ محەمەد تەمەنش یاوا دوە ساڵی، ئەڎا شۊتییەکېش بە نیازو تەوافی بەردشۆ پەی مەککەی، دمای تەوافی لوێ پەی یانەو ئامینۍ، وەختێ یاوێ وەرۆ، ئامینۍ ئەڎاو محەمەڎی پېسە دەسەگوڵی محەمەدش نېیا سینەشۆ، خاس خاس بوەش کەرد، باباش فرە دڵ وەش و مەدهوش بی، بەڵام دماتەر بە تەکلیف دیسان محەمەدش چەنە وەرگېرتێ و بەردشۆ چەنی وېش.
بەبۍ بیسمیللا، تاکی تەنیای فەرد
نە کارێ مەکەرد، نە خوراک مەوەرد
هەر بە دەستی ڕاست، عەمەل، مەکەردش
دەستی چەپ، جە کار، هیچ نمەبەردش
بە دەستی چەپش، ئەو شای بەهرەمەند
نە هیچ مەبەخشا، وە نە هیچ مەسەند
غەرەز ئەو نۊهاڵ، شیرین جەماڵە
عەمری شەریفش، یاوا، دوە ساڵە
جە دمای دوە ساڵە، حەلیمە یەک ڕۊ
هۊرگېرت، محەمەد، شای فریشتە خۊ
بەردش وە مەککەی، شەریفی ئەعزەم
وە لای ئامینە، بانووی موحتەرەم
ئامینە، ئەو ڕۊ، مەدهۊش بیی جە هۊش
وېنەی دەسە گوڵ، بۊ نېیا، وە بۊش
عەبدولموتەلیب، جە ئیشتیاقش
پەی پەی مەبۊسا، دوو ئەبرۊی تاقش
هەرتا، یەک هەفتە، بەند بیی جە لاشان
حەلیمە عەرز کەرد، جە خاک و پاشان
ئاب، هەوای مەککە، دڵ، وە ئەندېشەن
جە حەرارەتش، بۊی سەبوون پېشەن
محەمەد، جە نۊ کەرەم بکەن، پېم
هەتا بەرووشۆ، دیسان وە لای وېم
ئەوەند ئیلحاح کەرد، هەرتا کە تاوا
ئیلتیماسی ئەو، وە قبووڵ یاوا.[1]