#سەیدی هۆرامی#
دمای مەرگیش، سەیدی گەرەکشەن یارەکېش بلۊنە سەروو مەزاریش، گەر شەرت و وەفاش مەندەن، پەی جارێ بلۊنە سەروو مەزارو سەیدی، ئینجا چاگە مەوینۊ کە چەنی دوود و جەستەی سۊتەیش دلۍ کفنەکەیشەنە بەرمشۊن، ئانەیچ بەڵگێوەن پەی مەنەی وەفا و عەشقو سەیدی، حەتتا دمای مەردەیچ.
چراغم يارم، چراغم يارم
عەمرم، زيندەگيم، چراغم، يارم
ياری بۍ بەينەت، دۊستی دڵدارم
تۊ باره تەشريف وه سەر مەزارم
ئەر شەرتو ئيقرار، وەرين مەندەن پېت
ديڎەی ئينتيزار من، ئانا نه ڕېت
چوون کوشتەی هيجران داخی دووری تۊم
سا تۊ دمای مەرگ، بۊ وه سەر گڵکۊم
تەماشای گڵکۊی تارم کەر، دوڵبەر
دوودی سيای تار، لېش مەيۊ وه بەر
تالېت مەعلووم بۊ، سەوڵی خەرامان
من جه داخی تۊ، بەیتەور پېم ئامان
ئەوسا تۊ مەزار قەبرم شکاوای
وه حاڵی جەستەی زەليلم ياوای
ديای ئايری هيجران جه تەندا
چ تەور بەرمەشۊ، دووش نه کەفەندا
مەزانی نازار، ساحېب شەرتو شۊن
«صەيدی» کوشتەی داخ، دەردی دوری تۊن.[1]