باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎهەمە

میرزا ئۆلقاڎرو پاوەی، باس جە گرانیێ مەکەرۊن کە چا سەردەمەنە ئامان ملوو خەڵکیرە، ماچۊ: حەوت ساڵۍ واران نەواران، خەڵکی هەرچی عەلەف و ئەشیا بېیەن، بەکارشان ئاوەردەن، ڕزق و ڕوزی نەمەنەن، گەڵاو دارانشان واردەن
بەڵ، هەم جەو ساڵ، جەو زەید و ماوا
قەحتێ عەزیمێ، بە مەککە یاوا
هەفت ساڵ، چوون یەکسەر، واران نەوارا
زەمین جۊشش دا، چوون سەنگی خارا
وە ئەمری فەرمان، ڕەبولعالەمین
بڕیا، توخمی ڕزق، نە ڕووی سەرزەمین
عەلەف، ئەشیا، یەکسەر، گرد وەردەن
ئەوراقی ئەشجار، گرد تەمام کەردەن
باقی هیچ نەمەند، هەنی پەرێشان
مایېل بین، بە زەبح، ئەولادی وېشان
نان بە تۊ، ئیتر، مەبەردەن نامش
کەس نمەزانا، خۊ چوونەن، تامش
یەک ڕوقییە نام، زەعیفەی بۍ عەیب
ئاما، وە گۊشش، هاتفێ جە غەیب
واتش: ئەی مەحشەر، تایفەی قوڕەیش
وەختەن پەرێتان، شیرین ببۊ عەیش
وەقتی ئەرزانی، ئەمن و ئامانەن
واڎەی پېخامبەر، ئاخر زەمانەن
نامش جە کەونەین، دایېم سەرتەوقەن
زهوورش، باعیس، ڕوزیی مەخلووقەن
بارانی نافیع، بە واسیتەی ئەو
مەوارۊ، پەیتان، چن ڕوز و چن شەو
تەفحوس بکەن جە بەینی وېتان
یەک، شەخسی بوزورگ، ها جە،دلېتان
باڵا بڵندەن، سفید ئەندامەن
گوشاڎ پېشانی،شیرین کەلامەن
ئەو شەخسە، چەنی فەرزەند زاڎەی وېش
هەفت ساڵەی عەزیز، حەقق پۍ دادەی وېش
بەیان وە تەواف، وە بەیتولحەرام
باقی سەنادید، زومرەی خاس و عام
وە قەلبی تاهیر، وە عەقیدەی پاک
جە کۊی(ئەبو قەیس)، سەرساوان نە خاک
ئا شەخسە، کەردش، نزا پەی باران
ما باقی مەخلووق، گرد دەس هۊرداران.[1]