باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و چل و دوەمە
دیسان پەی قەناعەت پەنەکەردەی قوڕەیشیەکا حەزرەت بە یارمەتی زاتو هەققی، داواش جە درەختی کەرد جە ڕیشە کنیۊ، جە ڕیشە کنیا، ئاما وەردەمو مەجلیسەکەینە مدرا، بەڵام کافرەکۍ هەر ملشا نەڎا، واتشان مەشۊم ئەمرە بە درەختەکەی کەری، دوە لت بۊن.
جەو دما حەزرەت نەدا کەرو جەخت
وە زوانی حاڵ تەلەب کەرد درەخت
فەرما: ئەی درەخت سنعەت سازی حەقق
ئافەریدەی زات بۍ هەمتای موتلەقق
ئەگەر تۊ ئیمان بە خوڎا داریی
غەوغای قیامەت وەچەم مەداریی
وە ئیزنی مەعبوود دەهەندەی بېباک
ڕیشەت گرد یەکسەر بەرئاوەرد جە خاک
بۊ تاوی مەجلیس لاڎێ من و تۊ
چوون یارانی یار بکەین گفتوگۊ
دەرسات ئەو درەخت هیچ نەکەرد درېخ
جە ڕیشە ئاما هۊرکنیا جە بېخ
نیشت نە ڕووی هەوا وېنەی کەبووتەر
تا شیی وە حوزوور شای خەیرولبەشەر
مدرا وە پاوە، وە لەببەیک لەببەیک
واتش: یا ڕەسوول سەلام و عەلەیک
حەزرەت عەلەیکش دەردەم سەندەوە
لاحەولە وەلاش جە نۊ وەندەوە
پەرساش جەو درەخت ئاڵای عەجیب تەرز
شاخ و بەڵگ شیرین شوخی باڵا بەرز
فەرم: ئەی درەخت کۍ تۊش ئیجاد کەرد
تۊ هەم ئیمانت بە کۍ ئاوەرد
وات: مەعبوودی من خوڎای بېباکەن
سنعەتسازی ئەرز، هەر هەفت ئەفلاکەن
یا نەبی وەڵلا، هەرکەس ناوەرۊ
ئیمان بە خوڎا و شەهادەت بە تۊ
جە ڕووی قیامەت جەهەڼەم جاشەن
ڕەفیقی شەیتان دوزەخ ماواشەن.[1]