باخچێوە بېگەرد
ئەوەنویستەی و دەسکاریکەرڎەی: ئەسعەد ڕەشید
بەشۍ سەڎ و پەنجا و پەنجەمە
جەعفەر، مامۊزاو پېخامئاوەری لوا وەردەمو نەجاشینە مدرا، دەسش کەرد بە جوابدایۆ پەرسەکا نەجاشی دەربارەو دینە تازەکەی.
جەعفەر ئېڎ شنەفت ئاما بە گوفتار
عەرز کەردش واتش: ئەرۍ شەهریار
ئېمە جەی وەرتەر گرد خاتر شاڎ بین
مەشغووڵی ئایین ئابا و ئەجداد بین
کاسیب بیم وە بت پەرسی وېمان
حەقق پېغەمەرێ کیاست پەرېمان
جە ئەسڵ و نەسەب بە سیدق و یەقین
بە لوتف و کەرەم بە تەرز و تەمکین
بە حەیاو بە حیلم بە موعجیزەی پاک
بە لەفزی شیرین ئایەی شەرەفناک
ئېمەش دەعوەت کەرد بە حەقق پەرەستیی
بېدار بین جە خاو نادانی و مەستیی
تەرکی کوفر و شیرک کوففار کەردمان
سوجدە بە خوڎای واحید بەردمان
غەیر جە ئەو مەعبوود هەر مەبۊ بېیەن
مەعبوودی هەنی کەس بە حەقق نېیەن
سەرمەشقش ئېدەن پەیمان پېغەمەر
ئەمر بە مەعرووف نەهی بە مونکەر
تاعەت حەقق وېش قەرار دان جە سەر
کیانان بە وار پەرۍ پېغەمەر
سەلات و سەوم، حەجج و زەکاتەن
جە ئایەی کەلام خوڎا وېش واتەن
قەولی پېغەمەر جە لامان حەققەن
حەقق بیناو دانا فەردی موتلەقەن
جەو بۊن تەرکی دین ئەجداد کەردمان
سوجدە بە خوڎای واحید بەردمان
چوون داری بیدەن بت بۍ سەمەرەن
محەمەد شافیع یەومی مەحشەرەن
قەوم هەم ڕاشان چن ئەزیەت پېمان
تا گوریز کەردەم جە ماوای وېمان
ئېمە بە فتوای پېغەمەر جە نۊ
گرد وېمان وستەن وەسای پەنای تۊ
تا زووڵمی قوڕەیش نەیاوۊ پېمان
شاغیل بین پەی تۊ بە دۊعای وېمان. [1]