قەدیم دنێڤا تایفەیێد ئێزدیێد کوردستانێ و قسمێ مەلا و فەقەهان دوژمناهی هەبوو، جارەکێ مەلا محەمەدێ قولپی، خورجەکی بچووک کتێبان ل ملان و شیر و مەتال ل پشتێ، بتنێ تێ کوبێتە بایەزیدێ ژ بۆی خوەندنێ، تێتە دەشتا ئابقەیێ کفارێ کورەیێ، مەگەر هەشت سوارێد ئێزدیان ڕێ بڕ ژبۆی خرابیێ دنێڤا کورێ دا دمان، وەکو سواران ئەو مەلا محەمەد دیتن، هاتنە ڕیا وی و حەوش کر و گرتن و شەلاندن و برنە نێڤا کورێ کو بکوژن، خولاسە مەلا محەمەد برن و د کورێدا دەست و پێ گرێدان، پاشی پیرەکێ ئێزدیان ددەتە شیری و تێتە سەر مەلا محەمەد و دبێژە وی، کو وەرە ژ دینێ محەمەدیان بدەرکەڤە و ببە ئێزدی، یانێ نە ئەز دێ تە بکوژم، مەلا محەمەد دبێژە استغفر الله، ئەڤ شولە نابی، من دکوژی بکوژ، ئەمرێ خودێیە، ئەز بکوشتنێ ڕازیمە، ئیجارێ پیرێ ئێزدی دبێژە مەلا محەمەدی، ئەگەر دینێ تە حەقە و ڕاستە، بلانێ محەمەدێ وەبێتن و تەژ کوشتنێ خلاس بکەتن، مەلا محەمەد دبێژە، محەمەدێ من نزانی کو ئەز دڤی حالی مە، ئیجارێ پیرێ ئێزدی دبێژە، ژ بۆی تە دەستوورە، گازی محەمەدێ خوە بکە، بلانێ بێت و تە ژ دەست مە بدەرینە و خلاس بکە، خولاسە ئەو پیرێ ئێزدی گۆیا ل وەجهێ ئیستیهزا زۆری ل مەلا محەمەدی دکەتن، ئەلبەتتە تو دێ سێ جاران ب دەنگ گازی محەمەدێ خوە بکەی، پاشی ئەز دێ تە بکوژم، ئیجارێ سێ جاران ئەو مەلا ب دەنگ ژ ترسا پیری گازی دکە، کە یا محەمەد، یا محەمەد، یا محەمەد مەگەر ب قەسان محەمەد ناڤێ مرۆڤەکێ حەیدەری دگەل دەﮪ سواران ل وان نێزوکا ب ڕیا خوەدا دچوون، ئەوان سواران دەنگێ گازیێ بهیست بکنارێ کۆرێ ڕکێب دکەن و ڕاست تێنە هشارێ، کو هەشت سوارێد ئێزدی دوێ کورێدا پەیا بوونە و مرۆڤەک گرێدانە، ئێزدی ژی پێ د حەسن، بەلێ چەند سوار ئەڤنە ژ نشکێڤە پەیدا بوون، دەست ب ڕەڤێ دکەن، ئەو سوارێد حەیدەران دگەهن چار نەفەر ئێزدیان د جهدا د کوژن و چار ژی دەڕڤن خلاس دکەن و دەست و پێ یێد مەلا محەمەدی ڤەدکەن و پرسیار دکەن، کو ئەڤە چ ئەحوالە، ئیجارێ مەلا محەمەد ماجەرایێ وەکو بوویی ژبۆی وان سواران نەقل دکەت، پاشی ئەو سوار هەسپەکی ژی ژ هەسپێد ئەخترمە ددەنە مەلای و بڕێ دکەن تێتە بایەزیدێ و ئەڤ حیکایەتە دنێڤا خەلقی دا مەعلووم بوو.
#مەلا مەحموودی بایەزیدی# [1]