دل یەکە دێ عشق یەک بت عاشقی یەک یار بەس
قبلە دێ یەک بت قولووبان دلبەرەک دلدار بەس
من د بەندا زولفەکێ دل دا ب دەستێ پیرێ عشق
لەو د عشقێ دا مە بەست ئحرام و یەک زوننار بەس
تەرح و تەرزێ بوونە زوننار و چەلیپا یەک ب یەک
لەو م زوننار و چەلیپا یەک تنێ یەکجار بەس
هن ژ نک دێرێ ڤە تێن قەستا کنشتێ هن دکن
نەی ژ وانم نەی ژ وانم من دەرێ خەممار بەس
گەر چ تێن ڕەقس و سەمایێ هەر سەحەر سەد نەیشەکەر
من د بەزما سوڕشرینان ئەو شرین ڕەفتار بەس
وەه چ والا گەوهەرن هاتن لباسێ جسم و جان
من ژ وان حووری سرشتان ئەو پەری ڕوخسار بەس
حەوجە سحرێ سامری نینن کو زولفا ڕەش بکت
چەشم بەندا دلروبایان کاکولا عەییار بەس
بولبولان سەد گول د چاڤن چاڤ ل سەد گول دی دکن
من ژ باغێ گولعزاران یەک گول و گولنار بەس
من د باغێ گولفرۆشان دی عەجەب ڕەسمەک غەریب
خارتەبعان گول ب دەست و گولپەرەستان خار بەس
ئەو جەفا چوو دەر ژ حەد زولما تە بر حەتتا ب چین
ڕەحمەکێ جارەک نەکی هەی زالم ئەڤ ئازار بەس
غەرقێ دەریایێ گوناهین تشنەیێ لوتفا حەقین
ڕەحمەتێ ئامورزگار و شەفقەیێ غەففار بەس
ئەهلێ دونیایێ سەراسەر دژمنێن من بن مەلا
پشتەمیرێ من عەلی بت حەیدەرێ کەررار بەس
#مەلای جزیری# [1]