‘Armanca dagirkeriya Tirk gelê kurd û #rêber Apo# ji hev qut bike’
Lîloz Hisên/Qamişlo
Endama insyatîfa azadî ji bo Rêber Abdullah Ocalan Ayşe Efendî diyar kir ku armanca dewleta Tirk a dagirker ji ferzkirina sîstema qirkirn û îşkenceyê li ser Rêber Abdullah Ocalan di nava gelê kurd û rêbertî de qutbûnekê çêbike. Herwiha di şexsê Rêber Apo de gelê kurd qirbike.
Rêber Abdullah Ocalan ev 26`salin di girtîgeha Îmraliyê de di bin sîstema qirkirin û îşkenceyê de ye, herwiha ji sala 2019`an de tu hevdîtin ne ji hêla malbatan an parêzeran nehate kirin. Piştî 44 mehan di 23-10-2024 an de yekem car destûr hate dayîn ku malbata Rêber Abdullah Ocalan hevdîtinê pê re bike, Rêber Abdullah Ocalan bi rêya biraziyê xwe Omer Ocalan peyamek gihand raya giştî û diyar kir ku tecrîda li Îmraliyê dewam dike û got: “Tecrîd berdewam dike. Eger şert û merc bêne afirandin, ez xwedî hêza teorîk û pratîkî me ku vê pêvajoyê ji zemîn şer derbasî ser zemîna siyasî û hiqûqî bikim”
Derbarê vê mijarê de endama insyatîfa azadiyê ji bo Rêber Abdullah Ocalan Ayşe Enfendî ji rojnameya me re axivî.
Endama insyatîfa azadiya Rêber Abdullah Ocalan Ayşe Efendî diyar kir ku sîstema qirkirin û îşkenceyê ku ev 43`ê mehin derheqê rêber Abdullah Ocalan de tê kirin, armanca wê ya yekemîn ewe ku di şexsê rêber Apo de vîna gelê Kurd bişkîne:”Lê armancên wan pêk nayên, berovajî vê yekê dibe, her ku diçe gelê kurd bi Rêber Apo ve tê girêdan. Dema peyva rêbertî tê ser ziman bi milyonan dadikevin qadan û ji bo rêbertî dibêjin em hene û em ê herdem di nava severberiyê de bin. Bi hezaran jin îro xwe li derdora rêber Apo û felsefeya ku ji bo jinê pêşkêşkiriye kom dibin û artêşa xwe avakirin.”
Ayşe Efendî wiha pê de çû:”Di 23`ê vê mehê de destûr hate dayîn ku tenê malbat hevdîtinê bi Rêber Apo re çêbike, di hevdîtinê de nameya Rêber Apo hate ragihandin ku (tecrîd berdewam dike. Eger şert û merc bêne afirandin, ez xwedî hêza teorîk û pratîkî me ku vê pêvajoyê ji zemînê şer derbasî ser zemîna siyasî û hiqûqî bikim), dema ku rêber Apo dibêje ez karim pirsgirêka Rojhilata Navîn û doza kurdî çareser bikim, divê di serî de ew bê azad kirin û sîstema qirkirin û îşkenceyê bi dawî bibe, da ku karibe nêrînên xwe ji bo Rojhilata Navîn, jin û gelê kurd bide. Siyaseta qirêj ya ku li Rojhilata Navîn tê meşandin û projeyên heyî çarseriyên guncaw pêşkêş bike.”
Derbarê sîstema îşkence û qirkirinê ya ku derheqê Rêber Apo de tê kirin Ayşe Efendî diyar kir ku ev binpêkirineke dij mirovahiyê ye û ji milê hiqûqî û qanûnî de jî pêwîste ku neyê qebûl kirin. Divê dewletên ku destekê didin dagirkeriya tirk û çavên xwe ji kiryarên wê digrin, careke din li xwe vegerin û dagirkeriya tirk di qada navnetewî de were dadgeh kirin.
ji bona azadiya Rêber Abdulla Ocalan bikevin nava tevgerê de. Insyatîfekê bidin destpêkirin ji bo azadkirina Rêber Abdulah Ocalan.
Ayşe Efendî destnîşan kir ku bi sedê salan siyasetên şaş û çewt tên meşandin û ev siyaset û kirîzên ku di cîhanê de tên jiyan kirin, tenê di riya ramanê rêber Apo dikarin bên çareserkirin. Ayşe Efendî got: Rêber Apo kilîta çareseriya Rojhilata Navîne û di Rojhilata Navîn de îro jinûve xêzkirina nexeşeyên siyasî û erdnîgarî tên kirin. Ji ber vê yekê pêwîste ku em zêdetir xebatê bikin, da ku di nava şert û mercên giran yên ku em têre derbas dibin de destkeftiyên xwe biparêzin û li hemberî hemû êrişan li ber xwe bidin. Di dawiya axaftina xwe de Ayşe Efendî got:”Di van rojên hesas û giran yên ku Rojava têre derbas dibe, êrîşên dewleta Tirk a dagrker li ser herêmê û hedefgirtina avahiyên xizmetguzarî û sivîlan; hêviyên me hene ku careke din şert û merc ji bona Rêber Abdullah Ocalan werin amedekirin ji bona ku hemû pirsgirêkên heyî çareser bike û hêviya gelan ji bona azadiyê pêkbîne.[1]