نامۍ: ئیماموددین
نازنام: مەردۆخی
نامۊ تاتەی: شېخ محەمەڎ
شاڵۊ مەرڎەی: 1844ز.
یاگۊ پېڎابییەی: #دەژن_ هۆرامان#
یاگۊ مەرڎەی: #دەژن_ هۆرامان#
$ژیۋاینامە$
ئیماموددینی مەردۆخی؛ ئی شاعېرەمان نامېش ئیماموددین کوڕو شېخ موحەمەدی، ملۊوە سەرو شېخ ئەحمەڎی تەختەیی، بەپاو ئا بەڵگا کە کە ئینێ وەردەسمانە دلۍ دەگاو (دەژن) ناوچەو هۆرامانی، ئامان دنیاو هەر ئەچاگەیچ یاوان پەنە. سەروەختو زاروڵەییشەنە چەنی تاتەیش خەریکو وانای بېیەن و دماتەر لوانەنە حوجرەو فەقیانی پەی وانای. ئی شاعېرەما فرەو شۊنگاکا هۆرامانی گېڵان،
سەرئەنجام جە شارو (سنە)ی، ودمی مەڵڵاییش وەرگېرتەن و دماتەر گېڵانۆ پەی زاڎگا و مەڵبەڼەکەو وېش و دمادماکانو ژیوایش بە وانە واتەیۆ و مۊچیاریکەرڎەی خەڵکی گوزەرنان، تاکو ساڵەو (1844ز.) کۊچی دمایینش کەرڎەن، یانەئاواییش جە ژیوای کەرڎەن و هەر ئەچاگەیچ بە خاکیشان ئەسپاران.
شېخ ئیماموددین، یۊن جە هۊنیارا کورڎی، هۊنییەکېش ناسکۍ و تەڕ و پاراۋېنۍ، منیشانە دڵ. هەرچن هۊنییەکېش جەمۍ نەکریێنێ و فرېشان دلېنە شیېنۍ، بەڵام ئا چن شېعرېشە هەکە پەی ئېمە مەنېنێ پېسە یاڎگاریێ، پلە و پایەو ئاڎیمان جە بەهرەی شېعرینە نیشانە مڎان. یۊ چا شېعراشە کە ئینا وەردەسمانە کە پەی کۊچکەرڎەو (شېخ غەفوور)ی، جە دەگاو (کاشتەری پەی دەگاو هەجیج) واتېنەش.
نموونێ جە شېعرەکانو شېخ ئیماموددینی مەردۆخی:
ڕاگەی حەق ناسان:
عەرضە داشت بەندەی مەحزوون مەهجوور
وە خزمەت مەخدووم کاکە شېخ غەفوور
(أحبُ الأحباب) خوېشان و ئەقوام
مورشد ئەنام، خەواص و عەوام
ڕەفێق شەفێق ئی بەندەی حەزین
بە گەزاف مەشهوور بە ئیماموددین
مونهی ڕای مونیر مەخدووم مەدارۊ
ئەر پەرسی ئەحواڵ موخصلت ئارۊ
جەو دمای سەفەر مەعهوود مەعلووم
باز وەشار ئامام وە ئی مەرز و بووم
شنەفتم چۊڵەن تەکیەکەی کاشتەر
هەر دەم وە جگەر مەدۊم صەد نەشتەر
ئەیوانچەی یانەت جای مەکروو ڕێوەن
حەوز و موسەڵڵات مەملو جە دێوەن
نە سەدای ئاذان، نە قەد قامەتەن
چېش واچوون یا شێخ یە قیامەتەن
بە مەرگت قەسەم دەرد کاری وېم
پەی ئی بازاڕە گشت جە دڵ بەرشێم
ئیسە ئیستدعام جە گردین خاسان
پیران پڕ دین ڕاگەی حەق ناسان
خوصووص ئەو بوزورگ پەنات پێ بەردەن
هیممەتش حازر ئەرصەد کە مەردەن
خوڎاوەند بە خێر ڕەحمێ بکەرۊ
تەفرەقەی یاران گشت جەم بدەرۆ
بەڵکەم ئی مەحزوون مەرگ نازاران
دڵش هەر شاڎ بۊ بە دین یاران
وەرنە ڕۊ بە ڕۊ خەمان لێش کۆوەن
نیدای شادی و زەوق پەی ئەو ڕۊ ڕۊوەن.
ماناو شېعرەکۍ:
ئەی کاکە شېخ غەفوور، گلەیېم هەنۍ جە خزمەتتەنە، هەرچن تۊ ئینای یاگۍ قۆم و کەسوکاریمەنە، یار و یاوەری قەڎیمیمەنی.
دماو بارکەرڎەیت، لوای پەی زاڎگا و مەڵبەڼەکەیت و دیم کاشتەر چۊڵەن. هەیوانۆ یانەکەیت بیېنە یاگۍ دیوانی، ئیتر نە دەنگو بانگی مەی و چېش واچۊ ئەی شېخ، ئینە ڕۊ پەسڵانییەن، بە مەرگت قەسەم دەردی کاریمەن. ئیسە من داوا جە گرڎو پیاخاسا و پیرا مەکەروون بە تاییبە جەنابت کە پەنات بەردېنە لاو سوڵتان عوبەیدوڵڵای، یانی (کۊسەو هەجیجی)
خوڎا بەزەییش بێوە پۊرەما و گرڎو یارانی جەمۍ بکەرۊوە، بەڵکوم کەمێ دڵم شاڎ بۊوە، ئەگینا ڕۊ بە ڕۊ فېشتەر پەژارۍ دڵم مەگېرارە و خەمۍ و خەفەتۍ مەکوشام.
ئەسعەد ڕەشید.[1]