چە ئینەی زېیاتەر بېدەنگیکەرڎەی تاۋانا
نویستەی: #ئاکۆ مارانی#
پەیامېۋ پەی گرڎو ھامزۋانە زەحمەتکېش و ژیۋای و ژیۋار-دۊسەکا
سڵام و ڕېز پەی گرڎو ئەنجۇمەنا و کاناڵا و بەرنامە ڕادیۆیی و تەلەفزیۆنی و گرۇپۍ و کاناڵۍ و پەیجۍ و ھەر پاسە چالاکا گرڎو تۊڕە کۊمەڵایەتییەکا تێلەگرام، فەیسبۇک، ئینستاگرام و ...تد، جارېۋتەر نۆرۊزتا سەرەتاو وەشی و ئازاڎی و ھامتایی و ئاسۇڎەیی و تۆلێرانسی بۊ.
ئازیزاو من، بە پەیلۋاو منیچ تېکەڵکەرڎەی (زۋانی و تارېخی و ئەدەبی و ھونەری و ئایینی و کولتۇری و ڕۊشنۋیریی) چنی (ڕامیاریی و ئایدیۆلۆجی)، ھەر ئا یانەۋېرانییە سەرەنجامشا، کە نازییەکۍ سەرو ئاڵمانیایرە ئاۋرڎشا؛ پەیجۊریکەرڎەی چە بارەو ۋەڵینەو ھەر کۊمەڵېۋۍ، ھەر زۋانېۋی، ھەر چېۋېۋی تەری کولتۇریی بە چەشمەکۍ ئایدیۆلۆجیۍ، سەرەنجامەکەش بەس بە کوشتەی زۋانی و ۋیری و ھونەری و ئەدەبی و ..تد تەمامیۊ.
من تکاکەرۇ، با ئېمەی ھ‌ۆرامی-زۋان [ کە چە ئێران و ئێراق و وەرکۆتی میانېیەنە بە کەسۍ ژیرۍ و بە ئاۋەزۍ ئەژناسیێنمۍ] چە خرابکارییەکا کەسا تەری ئەزمۇنگیری کەرمۍ و کۊمەڵە بەڎبەخت-کریێکېما تۇشۇ ئانەی نەکەرمۍ، کە ڕ‌ۆتە ڕامیار و ئایدیۆلۆجیکارەکۍ کۊمەڵەکۍ وېشا تۇشۇ نەھامەتی شۆڤێنیزمۍ و فاشېزمێ کەردۍ.
ھیشتا زامۍ جەنگی ئایدیۆلۆجیی دێمۆکرات و کۆمەڵەی و ڕزگاری و کۆمەڵەی و جەلالی و مەلایی جەسەو ھ‌ۆرامانینە ونېشا چنە مێۋ، با وېما تۊش‌ۊ یانە ۋېرانیېۋی تەری نەکەرمۍ و چە ھیچی خۆڕایی دوژمنۍ نەتاشمۍ و ھەر پاسەیچ (گۊرانی) قسەکەرا، کە زۋانو قسەکەرڎەیشا دیالێکتېۋو (زۋانی ھۆرامی)ن، نە کەرمۍ بە چەکو جەنگېۋی پېسی ئایدیۆلۆجیی.
(ھۆرامی) زۋانا و چەترۊ گرڎو دیالێکتە ھ‌ۆرامییەکان چە بلۇجستانو پاکستانی تاکو سەرنیشتو ئێرانی و ژاۋەرۊ و تەخت و شامیان و لھۆن و پاۋە و زەنگنە و خانەقین و کەرکۇک و سوفەیییە و زوممار و ..تد
چېۋېۋتەر کە مشیۊ ئېمە ئاگاڎارېش بېمۍ، نەوەشی و ژەھرو نەتەۋەین، پېسەو پېکئامای ئایدیۆلۆجیی، ئەر ناسیونالیزم و ناسیونالیزم-تاشای و د‌ۆڵەت چېۋۍ خاسۍ بېیێنۍ و خزمەتو مر‌ۊڤایەتینە بیێنۍ، بەدڵنیایی ھۆرامی-زۋانەکۍ پېسەو کەسە (ژیر و ئاۋەزدار و دەسڕەنگېنەکا)، ئانە ۋەڵۍ ئۆروپییەکانە درۊسېشاکەرېنۍ.
پاسە تارېخ سەلەمنۊش، چا کاتۆ نەتەۋە و د‌ۆڵەت درۊسۍ بېیېنۍ، مرۊڤایەتی کۆتەن مەتەرسی و بېجگە جینۆسایدی و نائارامی و نائاسۇڎەیی و مەرگی، ھیچ چېۋېۋی تەرشا بەرھەمناۋرڎەن.
چی ڕۊ نۆرۊزینە، من پېسەو کەسېۋی (ھ‌ۆرامی-زۋانی) چە گرڎو (ئەنجۇمەنا و کاناڵا و بەرنامە ڕادیۆیی و تەلەفزیۆنېیا و گرۇپۍ و کاناڵۍ و پەیجۍ و ھەر پاسە چالاکا گرڎو تۊڕە کۊمەڵایەتییەکا )تێلەگرام، فەیسبۇک، ئینستاگرام و ...تد) وازیار ھەنا، کە پېسەو ئەرکېۋی تاریخی مەترسیی و نەھامەتباریی تېکەڵکەرڎەی (زۋانی و مافە کولتۇریی و کۊمەڵایەتیی و سرۇشتیی و گەرڎۇنییەکا) چنی (مەرامە ڕامیاریی و ئایدیۆلۆجییەکا) سەرنجبڎا و ئەرکو سەرو شانەو وېشا، ۋەرپەرسیاریی تاریخی وېشا ۋینا و بېدەنگۍ نەمەنا، چۇنکە سەبای فرە دېرا و ھیچ کەس و ھېزېۋ نمەتاۋۊ تکېۋ ونۍ و خەمېۋ و ئېشېۋ کە ۋەرەنجامو جەنگی ئایدیۆلۆجیی [ نەتەۋەسازیی]ن گېڵنۊۋە؛ ئەر وېما نەبانۍ و گېلۍ نەکەرمۍ، ھەر ئیسە ۋینمۍ، کە چە شارو پاۋەی و مەریۋانینە گرژی میانو کەسۍ و ڕ‌ۆتە ئایدیۆلۆجیگەرەکا یاۋان جەنگ و ھەرای خېزانیی و دژماندای و پەلاماردای و سۇکایەتی!
ئانەیچ ۋەرەنجامو چۊڵەخرتۊ چڼ کەسېۋی (ناۋەرپەرسی و وۍ-بەرۋزی و دەسەڵات و نام-بانواز)ین و قوربانیۍ چۊڵەخرتدای کۊنە قینۍ و جەنگی ناھۊشیارانەو مېیانو [ جاف و گۊران]ی ھەر زاڕۊڵۍ خەڵکە زەحمەکېش و نەڎار و بېدەسەڵاتەکەینۍ، کە ھېزی مېڎانو جەنگی ئایدیۆلۆجېیانەو (حدکا و کۊمەڵە و ڕزگاری و جەلالی و مەلایی)نە کوشیێ و بریندارۍ کریێ و دەرۇنشا شېۋیا و ئاۋارۍ بیۍ و درۊسکەرۍ ئا جەنگاچە ھەردەم با بە مام-ئۊسێ و دکتۆرۍ و پڕ‌ۆفیسۆرۍ و دەرۇنی نەوەشو ئا کەسا بە مجیای ونۊ ئېمەی بەڎبەختکریای مرکیۊراۋە.
من پېسەو وېم، ئیتر چە ئی ڕۊۋە ئاشکراکەرڎەی مەرامو ئا جۊرە کەسە (نەوەشە ڕامیار و ئایدیۆلۆجیکارا) بە ئەرکو سەرو شانەو وېم مزانۇ، تاکو زاڕۊڵەی و گەنجیی نەۋەکا ئیسەی پېسو زاڕۊڵەی و گەنجیی من، چېرو تەۋەنا و دیمەکا و خوڵۊ جەنگە د‌ۆڵەتیی و میلیشیاییەکانە جېیانەمەنۊ.
سەرکۆتەی پەی مرۊڤایەتی
بەڵۍ پەی مافی سرۇشتیی و گەرڎۇنیی و کەسیی گرڎ کەسېۋی سەرتاسەرو دنیاینە
شەرمەزاریی پەی ھەر کەسېۋی کە کەسەکا پەی بارگرژی و جەنگی و کېشمەکېشی ڕامیاریی و ئایدیۆلۆجی ھانمڎۊ.[1]