#ئێستا کچێک نیشتمانمە#
ئەی نیشتمانی تازە پیاکەوتوو!
لە ئیستەدا تۆ ئەگەر لەبەر سەرقاڵیی
بە بۆنکردنی نەوتەوە، سەر نەپەرژان،
بە هۆی گەمەی سێ ڕیزکێنی دیموکراسی و
سەر نەخورانت بە هۆی کورسی وەزارەت و
بە سەفەری هەندەران و خەلیجەوە...
بیرت نەبێ!
منێ لە چرای بێ نەوت بێکارتر
باش لە بیرمە!
ئێوارە بوو لە قەراغ شار
بە ڕێکەوت تووشی یەکتر بووین.
تۆ هێشتا هەر کڵاوەکەی
ڕاپەڕینت لەسەردا بوو!
هێشتا بۆنی یەکەم شەفەقی بەیانیی
ئەمنە سوورەکەت لێئەهات!
جارێ نەبووبووی بە تاوس
ڕەنگی پۆلیس و چاوەشت نەگرتبوو!
هێشتا جلی چاڵەنەوتت نەپۆشیبوو!
فێری گەمەی ڕۆڵێت و پۆکەر نەبووبوویت!
هێشتا تۆ هەر خەیاڵەکانت باخچە بوون
بۆ گوڵی خەم و هەژاریی.
تۆ ئەوساکە ژنی دووەم و سێهەم و
چوارەمیشت نەهێنابوو.
هێشتا نەبووبوویت بە والی
ئەو کاتە بوو: وتم گیانە:
تۆ کە لای خۆت وات داناوە
نیشتمانی هەموو دارێکی قوربانیت.
نیشتمانی هەموو ئاوێکی قوربانیت.
نیشتمانی هەموو گەڵایەکی سووری ئەم مێژووەیت؟.
بەڵام ئاخر تەماشاکە لە ئیستەوە
تۆ هەر لە مەل و باڵندەی باخەکانی
کۆشکی خۆتمان بۆ ئەهێنی لە جیاتی ئێمە
بخوێنێ.
تۆ هەر گۆڕی چرای کوڕت و
گۆڕی گوارەی ژنەکەت و
گۆڕی عەینەکی براکەت هەڵئەبەستی
کەچی مەزاری هەزاران باڕەکەو و ئاسکەکێوی و
شینە شاهۆ لەبەر ئەوەی ناچنەوە سەر
شەجەرەکەی چواردەوری تۆ، ناوەکانیان
لەم ساتەوە، ئەدرەسیان و پێناسەیان،
(با) بردوونی بۆ بۆشایی بیرچوونەوە و
دەنگیان پڕبووە لە خۆڵ و شوێنەواری
هیچ زامێکیان لە ئیستەوە دیار نەماوە!
#شێرکۆ بێکەس#. [1]
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە.=KTML_End=