وڵۊشە چېشەنە و چن جۊرېش هەنە و چەنی موریۊ؟
نویستەی: ابراهیم میکە علی
وڵۊشە جە گەنمە کۊیایا بەرهەم مێ و دوۍ جۊرېش هەنە:
یوە: ئەر گەنمەکۍ گرینیا و ئیجا هاڕیا پەنەش وچیۊ: وڵۊشە.
دوۍ: وەلێم ئەر بە کاڵیی گەنمەکۍ کۊیێبا، پەنەش وچیۊ: وڵۊشە کاڵە.
وڵۊشە پەی پەتڵەی و کفتەشۊرباوا، وڵۊشەی کاڵەیچ پەی شەلەمینۍ و دانەدۋۍ و چڼەها واردا تەری بەکار مەی.
وڵۊشە منریۊ سەر، کریۊ بە چاشتی، دمای ئانەی یاوا پەنە، پەنەش وچیۊ: پەتڵە یام ساوەر.
وەڵتەر کەیوانوە هۆرامییەکۍ ئۊساییشا کەردەن نیایسەرو وڵۊشۍ و پەتڵەینە و گوشتشا چەنی گرینان و بە ئاوەو گۊشتی نیانشا سەر.
وەلێم نامەکېش جە چېشیۆ ئامێنە، منیچ مەزانۇ.
ئۊسای هەکە ژیوای ساڎە بېیەن و واردەمەنی جۊرېش کەمۍ بیېنۍ، واردەی بنەڕەتی خانەواڎەکا پەتڵە بېیەن، بە فرەییچ زمسانەنە.[1]