باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و دەهەمە
بیلالی حەبەشی ئیتر بە فەرمی بی بە بانگدەرو موسوڵمانا، جە بانو مینبەریۆ ڕوێ پەنج جارۍ نیدا کەرۍ پەی موسوڵمانا، پەی نمێ. ئەپا تەرزە یۊ جە پایەو ڕوکنەکا ئیسلامی کە نمانە، ڕېکە ۋزیاو گرد موسوڵمانێ کە گۊشش جە دەنگو بیلالی بیێ یەکسەر ڕوەو مزگی لوۍ، چاگە بە جەماعەت نما کەرۍ.
بیلال جەو دما تەشریف مەبەردش
جە بانی مینبەر نیدا مەکەردش
مەوات (الصلاة) واڎەی نمازەن
وەختی عیبادەت شای بۍ ئەندازەن
یەکێ موکەرەم جە یارانی یار
یانی عەبدوڵڵا بن زەیدی ئەنسار
شیی نە جامەی خەو یەک شەو جە شەوان
کە دیش نە خەودا شەخسێ نەوجەوان
ناقووسێ دارۊ بەڵام چە ناقووس
ئاڵای عەجیب تەرز سیای ئەبەنووس
واتش: بۍ ناقووس وە بۍ بەهانە
بفرۊشە بە من بەهاش بستانە
واتش: وەی ناقووس چېشەن نیازت
جە کام بابەتەن سوز و گوزارت
عەبدوڵڵا واتش: ڕەمزش دیارەن
پەرێ ئەسحابان خەیلێ وە کارەن.[1]