باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و سی و پەنجەمە

دمای ئانەی حەزرەت دوېجار گېڵاوە پەی لاو خوڎای تەعالای، کە داواش وەنەکەرد ژمارەو ڕکاتەکا کەمکەرۊوە، خوڎای گۆرە تەخفیزش چەنەکەردۍ و کەمېشکەردێ پەی پەنج ڕکاتا، بەڵام دیسان مووسا فەرماواش: گېڵۆ پەی لاو زاتو حەققی، داواش وەنەکەرە با کەمتەرېشا کەرۊوە، بەڵام حەزرەت فەرماواش: ئیتر شەرمەن بلوو پەی تەخفیف کەردەیشان.
مووسا عەرزش کەرد یا خەیرولبەشەر
دیسان پەی تەخفیف هەم تەشریف بەر
حەزرەت دا جواب شیرینتەر جە قەند
هەر چە خواهش کەم جەلای خوداوەند
قەبووڵ مەکەرۊ بینایی چاوان
عەتاش عەمیمەن لوتفش فراوان
بەڵام جەی فېشتەر خاس نېیەن تەکلیف
شەرمەن هەمدیسان بشوون پەی تەخفیف
جەو دما بە شاد موراجەعەت کەرد
تەشریف بە سەرای ئەوم هانی بەرد
قاپی فتووحات کریا و دەریاوە
هېمای حەلقەکېش هەر مەلریاوە
تۊی ئەسبابی نەوم پەڕ تەدارەکش
جەیوانی شەریف جای موبارەکش
هېمای عەتری هەڵم گەرمیش باقی بۍ
گەرمیی ڕوتبەی بەرز وەش دەماخی بۍ
یا حەقق بە حاجەت ئیسمی عەزیمت
بە حەققی جەلال زاتی قەدیمت
بە نووری ڕەسوول ساحیب تەخت و تاج
ئەو شەو بە عیززەت بەردت ئەو میعراج
عەبدی وېت (قادر) کۊی گوناهباران
عاسیی ڕووسیا هەم شەرمەساران
ببەخشەش بە فەزڵ بۍ پایانی وېت
بە عەفوی عەزیم نمایانی وېت
ئومېدش نېیەن میقداری یەک موو
بالله بغەیرەز جە لاتقنطو.[1]