#وەلی دېوانە#
قیبلەم مەردەنم، قیبلەم مەردەنم
ئامانت فەرزەن وادەی مەردەنم
نە حاڵاتی وەخت وەسیەت کەردەنم
نە ئاکامی سەخت گېیان سپەردەنم
وەسیەتم ئېدەن شای شەم ڕوخساران
بی وە باڵینم چۇن بەینەتداران
بۍ خۊف و ئەندېش جە کەس نەکەری شەرم
هۊردارە پەردەی حجابت بە نەرم
نەپۊشی جەمین شەمسی خاوەری
بۊ وە زانۊدا چۇن ئەسمای پەری
بنیشە وە بان باڵینم وە ناز
بوانە سۇرەی (یاسین) وە ئاواز
زوان بە ڕېزەی شەکەر ڕازەوە
دەنگ وە سەدای خاس وەش ئاوازەوە
جەمین وە عەرەق بۊی گوڵاوەوە
گۊنا و ئەگریجە و زوڵفی خاوەوە
جەو عەرەق نە دەور گۊنای مەﮪ پارە
جە سەری بتکۊ بگنۊ وە چارە
تا دیدەم جە سەیر دیدەی سېیات بۊ
نەزارە و نەزەر نازت زېیاد بۊ
گۊش هەم وە سەدای ڕېزەی ڕازت بۊ
بەو سۇرەی شەریف وەش ئاوازت بۊ
ئەر سەد جار (قابز) سزا بڎۊ پېم
هەنی نیم وە تەنگ گیتن کېشان وېم
ئەگەر بەو تەور بۊ ڕۊحی ڕەوانم
بیللا وە ئاسان بەرمەشۊ گېیانم
های چە وەش مەبۊ عومر و زیندەگیم
نە خاکی پای تۊ بکەردام تەسلیم
ئەگەر وە تەحقیق سەد کۊ گونامەن
ئینشەڵڵا بەهەشت هەشتەمین جامەن
[1]