قەباڵەکۍ هۆرامانی
بەشۍ: یەکەمە

دەنگوباسۍ جۊراوجۊرۍ دەمو ئېڎ و ئەویۆ، دەربارەو قەباڵەکا هۆرامانی و شۊنەو یاگېشان و چەنی یاوایشان دەسو پسپوڕو تایبەتو وېشان، چی لاو چۆ لاوە وەڵاکریانۆ و پەنەواز بە دوەپات کەردەیۆشان نمەکەرۊ.
ئانەی چېگەنە شایانو باسین، دکتور سەعید خان، ئەشناسیا بە (دکتۊر سەعید هەورامانی)، یەرۍ ژمارۍ چا قەباڵا، کە سەرو پۊسو گیانداریۆ نویسیێنۍ، یاونێنۍ دەسو پروفیسور (ئی ئێچ منس)ی.
پروفیسور (منس)، قەباڵێوە چانېشاش،کە پارچە پۊسێن بە(ئەلف بای ئارامی) سەرشۆ نویسیان، پەی (ئەی. کاولی) مەکیانۊ، پەی ئانەی پېسە شارەزێوە جە زوانی ئارامینە لەیەکش دۊوە و گۆهەرەکەیش ڕۊشن کەرۊوە.
پروفیسۆر مینس، دوۍ چا قەباڵاشە وانێوە کە بە گریکۍ نویسیێبېنۍ، بەرکۆت کە وەڵینەو نویستەی قەباڵێشا پەی ساڵەو (88)ی (و.ز) مەگېڵۊوە و دوەمشا پەی ساڵەو (21-22)ۍ (و.ز) مەگېڵۊوە.
ڕۊشنتەر قەباڵێوەشا پەی سەردەمو فەرمانداری (ئەشک-ی نۊهەم) مەگېڵۊوە، کە بە مېهردادی دوەم ئەشناسیان و میانو ساڵەکا (77-124)ی (و.ز) دەسەڵاتداریش کەردەن. ئەویتەرشا پەی سەردەمو کۊتاو فەرمانداری ئەشک-ی سېڼزەهەم (ئەرد-ی یەکەم)ی مەگېڵۊوە و سەرەتاو فەرمانداریی فەرهادی کوڕیش، کە بە فەرهادی چوارەم نامبانگش بەرکەردەبۍ.
ئانەی کە جە لایەنو (مینس)یۆ دەربارەو ئا دوە پارچە پۊسەیە وەڵاکریانۆ، ڕېکەوتو ساڵەو (1910)ی زایینین، بەڵام ناواخنو پارچەی یەکەمی کە بە ئارامی نویسیان و پەی کاولی کیاستەنش، ساڵەو(1919)ی زایینی وەڵاکریانۆ.[1]