گەریلاکانی هەپەگە و یەژاستار لە شەمزینانی جولەمێرگ و بەرواریی سێرت، دژی سوپای تورک چالاکییان ئەنجامدا، لەو چالاکییانەدا کۆنترا گەریلایەک دژە گەریلاو چوار سەرباز کوژراون.
ئێوارەی ئەمڕۆ ناوەندی ڕاگەیاندنی هێزەکانی پاراستنی گەل- هەپەگە، لەسەر چالاکیی گەریلاکانی لە شەمزینان، جولەمێرگ و بەرواریی سەربە سێرت ڕاگەیەندراوێکی بڵاو کردەوە.
لە ڕاگەیەندراوەکەدا هاتووە: هێزەکانمان لە چوارچێوەی هەنگاوی شۆڕشگیرانەی شەهید باگەر و شەهید ڕونیا لە ڕۆژی 18ی ئەم مانگەدا کاتژمێر 05:00ی ئێوارە دژی ئۆتۆمبێلێک کە چەک و تەقەمەنیی دەگواستەوە بۆ گردی کەلەبە و بنکەی سەربازیی دوورێ لە ناوچەی شەمزینانی جۆلەمێرگ چالاکییان ئەنجامدا، لە چالاکییەکەدا ئۆتۆمبێلەکە بەتەواوەتی تێکشکێندرا و کۆنترایەکی تێدا کوژرا.
لە بەردەوامی هاتووە: گەریلاکانی یەژاستار لە چوارچێوەی هەنگاوی تۆڵەکردنەوەی شەهید مەدیا ماوا و شەهید ڕزگار گەڤەر، ڕۆژی 19ی ئەم مانگە کاتژمێر 09:30 خولەکی بەیانی دژی کاروانێکی سوپای تورک لەسەر ڕێگای چەمی کارێ و گوندی ئۆسیان لە ناوچەی بەرواری سێرت چالاکییان ئەنجامدا، لە چالاکییەکەدا ئۆتۆمبێلێک تێکشکێندرا و ئەوەندەی زانراوە چوار سەربازی سوپای تورکیش کوژراون.
هەروەها هاتووە: ڕۆژی 19ی ئەم مانگە ڕامانگەیاندبوو، کە لە هێرشێکی ئاسمانی سوپای تورک لە ڕۆژی 14ی ئەم مانگە لە قەرس هەڤاڵێکمان شەهید بووە، بەم شێوەیە ناسنامەکەی ئاشکرا دەکەین.
ناو و پاشناو: عسمەت دینچ
ناسناو: دژوار ڕەزان
شوێن و کاتی لەدایکبوون: مووش – 1995
ناوی دایک و باوک: ئایتەن – موزەفەر
کات و شوێنی شەهیدبوون: 14-8-2019 – قەرس
لە کۆتایی ڕاگەیەندراوەکەی هەپەگە-دا هاتووە: سەرەتا لە خانەوادەکەی سەرەخۆشی لە هەموو گەلی وڵاتپارێزی کوردستان دەکەین و بەڵێن دووپات دەکەینەوە کە ئاڵای ئازادیی کە شەهیدان داویانە بە دەستی ئێمەوە بگەینینە سەرفرازی.[1]