مېژوو ئەدەبیاتو یارسانی
بەشۍ شاڼزەهەمە

شا خوشێن لوڕستانی (1015—1074ز)
نامۍ تەمامەش (موبارەک شا) ن، نازنامش (بابا خوشێن یان شا خوشێن) ، بەپاو سەرچەمەکا ئایینو یارسانی و زیاتەر (سەرەنجام) ی، جە ساڵەو (406ک/1015ز) جە لوڕستان جە ئەڎێ بېیەن، پېسە جە ئەفسانەکا یارسانینە ئامان، شا خوشێن یەرەمین ئەدگارو کەردگارییەن سەر ڕوەو زەمینیۆ، جە لورستانەنە پېڎا بېیەن.
ماما جەلالە کناچۍ بیېنە، بەبۍ ئانەی کەسێ نېرینە توخوونش گنۊن شا خوشێنش بېیەن، ئی ڕازۍ پېسەنە سەرئاماکەو جە ئەڎا بییەو حەزرەتو عیسای، ئەفسانەو جە ئەڎابیەو شا خوشێنی پی تەرزەنە:
میرزا ئەمانا، یۊبۍ جە دوڵەمەڼ و سەردارا لوڕستانی، شش کوڕۍ و کناچێوەش بېنۍ، کناچەکۍ نامېش (ماما جەلالە) بۍ، ڕوێشا ماما جەلالە وەختێ وەرمەنە بېدارە بیۆن، پەی یەکەمین جاری ئا ساعبانە ڕۊشنایی وەرەتاوی مەگنۊ ڕوخسارش، گرۊڵیێ ڕۊشنایی مەلۊنە دلۍ دەمیش، گڵویشەرە وەزۊرە وار، چوونکم چېوێ مەتریاڵی نەبۍ گڵویشۆ بێوە بەر، دمایی ماما جەلالە سەرئاماکەش پەی ئەڎێش گېڵناوە، دمای موددێ لەم پەڕیش چەنە بەرکەوت، ئەڎا و تاتە و براکېش کەوتۍ گومان چەنەش، تاتەو ماما جەلالەی کورەکېش ڕاسپارێ کە واڵەکېشا بەران پەی یاگێ پەنهانی و کوشاش، براکېچش سەرو قسۍ تاتەیشا واڵەکېشا بەردە پەی بەرو ئاوایی، یاوی ئا یاگۍ کە گەرەکشابۍ هەرمانەکېش چەنەکەران، برای گولانەشا سوزو شۊتی ئەڎاییش جما، ماچۊ: بڕوا نمەکەرو کەسما دڵش بێ ئی واڵېما کوشۊ، با چی چۊڵەوانیەیە جیاشبازمۍ بەشکوم دېوۍ بوەراش، بەڵام یۊ جە برایەکاش فرە دڵ ڕەق بۍ، ماچۊ: من جە فەرمانو تاتەیم بەرنمەشوون، شمە گەر نیازتانە بلدێ فەرماودۍ، من بە تەنیا کوشووش، ئیتر ئاڎۍ لوێ و براو واڵەکە پېوەرە مەنێ.[1]