یەوۍ تاشۊ
ماچا: فڵانەکەس یەوۍ تاشۊ
یەو تاشای دیارەن هەرمانێ ۋردە و قورسەنە، هەم زەحمەتەنە، بە گرڎ کەسی نمەکریۋ، ڕەنگە هەر هەرمانەی چامنۍ بېیەیش نەبۊ، بەڵام پېسە ڕازێ و هەم مۊچیارێ کریان بە سەرئامێوە و ئیدیۆمێ.
ماچا سوڵتان مەحمووڎ چەنی وەزیرکەیش هەیاسی ژیر، گردجارێو نەژناسیا گېڵێنێ بازارەنە خەیر و شەڕوو بازاری بوینا.
جارێوشا بازارەنە چۊتاشێوشا دی، یەوۍ تاشۍ.
سوڵتان مەحمووڎیچ گېڵاوە دما پەی هەیاسی و پەرساش ئینە چېشا و چ حکمەتێوا؟
هەیاسیچ وات: قوربان حەرچی من حەساب کەروو، ئی کابرا ئاژاولێ نېیەنە یانەشەنە و ڕۊحش یانەنە ئاسووڎەن، پەوکەی متاوۆ یەوی تاشۆ.
سوڵتانی وات بە هەیاسی: ئینەیە مشیۊم بە من سەلەمنی، متمانەم نېیا پی قسێتە.
بە پەرسا و پەرس یانەو کابرای نەجاریشا یۆسەوە، پەرساشا هامسایا پەی وەزعێشا. ئاڎیشایچ وات وەڵڵا دەی ئېمە پی چڼە ئینایمێ پێوە جەنگ و جڵەبێوما نەڎیێنێ پوەوە.
لوەی ژەنەو کابرای نەجاریشا یۆسەوە و وېشا ئەژناسنا پەنەش و بازېو لیرێشا داو واتشا وېرەگا ئی پیاتە ئاماوە، بە جۊرێو ڕۊمەڵخەزەیو گیسنەنە یانەتانە.
خولاسە ژەنێ لیرێش هۆرگېرتێ و وېش ئاماڎەو ئاژاولێ چنی شوەکەیش کەرڎش.
وېرەگا چۊتاش حەر دوورەوە ئاماوە، کرژ ژەنېش بە تووڕەیوە ماچۊ: دا پاڵاکات چەولاوە وەژە. ساعبێویچ لوای ئینەتە پیس کەرڎەبێ.
بە هەرحاڵ چیلاوە و چەولاوە تانێ فرێ مڎۆنە شوەکەیش و چەکر و پیکان وزۊ ڕا.
چۊتاشی گیروارڎە وینۆ نەخەیر وەزعە ئاڎە نېیەنە. حەر نمەزانۆ چکۆ سەرە بنیۆوە پەی وتەی.
ساعبێو زوو کابرای چۊتاش ملۊوە دووکان و سوڵتان مەحمووڎ و هەیاسیچ ملاوە بازار و بەرەو دووکانیەرە.
مڎیا چۊتاشی فەقیر دیمەکێوی گەورە ئینا دلێ دەساشەنە و بەرزەپای ترەشتێ مشانۆ و تاکو جاڕێو دۆوە دیمەکی، یەرێ جارێ مڎۊۋە قاچو وېش.
فەقیر دیمەکیچ نەپێکێ چ بە (یەوا) بېیاوۊ.[1]