سۆران مەڵبەندێکی دابڕاو لە هونەری مۆسیقا و شانۆ
#11-07-2023#

هونەرمەند و شانۆکارانی سۆران بە نیگەرانییەوە دەڵێن: حکومەت پارە بۆ هەموو شتێک تەرخان دەکات جگە لە هونەر و چالاکی ڕۆشنبیریی، ئەمەش وایکردووە هونەر لە شارۆچکەکەیان پاشەکشی بکات و خاڵی ببێتەوە لە شانۆ و مۆسیقا و چالاکییە هونەرییەکان.
نزیکەی 10 ساڵ دەبێت لە سنووری ئیدارەی سەربەخۆی سۆران، چالاکی هونەریی و ڕۆشنبیریی و ئەدەبیی بە تایبەتی شانۆ و مۆسیقا، لە ئاستێکی زۆر خراپدایە، بە جۆرێک هونەرمەندان بە مردوو لەقەڵەمی دەدەن لەو ڕووەوە، لە ئێستادا ژمارەیەک گەنجی سۆران سەرقاڵی کاراکردنەوەی گرووپێکی شانۆن، بەڵام نەبوونی هۆڵ و پشتیووانی ماددی و کەلوپەلی پیویست، بۆ ئەنجامدانی شانۆگەریی و چالاکی هونەریی، لەکارەکانیان ساردی کردوونەتەوە.
شانۆکارانی سۆران گلەیی زۆریان لە ئیدارەی شارەکە و بەرپرسان هەیە کە بایەخ بە بوارە جیاوازەکانی هونەریی بەتایبەت شانۆ نادەن، ئەوان دەڵێن بەرپرسانی ئەو شارە هیچ لەبارەی هونەرەوە نازانن بۆیە پارەی بۆ تەرخان ناکەن و ڕێگە نادەن گرووپە هونەرییەکان کارەکانی خۆیان بکەن.
عەبە خۆشناو شانۆکارە و بەرپرسی سەنتەری هونەریی سۆرانە، لەساڵانی ڕابردوودا دەیان چالاکی هونەریی و شانۆی ئەنجامداوە، ئێستا توڕە و نیگەرانە لە دەسەڵاتی کارگێڕیی ئیدارەی سەربەخۆی سۆران، ئەو دەڵێت: سۆران لە بواری هونەریی هیچی بۆ نەکراوە و تەواو پشتگوێ خراوە، لەگەڵ ئەوەشدا ڕێگەنادەن گرووپە هونەریەکانیش کاری خۆیان بکەن.
هەروەها وتیشی: ماوەی شەش مانگە کۆمەڵێک کەس کارێکی شانۆییان ئامادەکردووە، بەڵام بەهۆی نەبوونی هۆڵ و پێداویستییەکانی ناوهۆڵ نمایشی شانۆکە ڕاگیراوە، هیچ کەسێک نییە لەو شارە هاوکاری ئێمە بکات بۆ ئەوەی شانۆ و مۆسیقا و بوارەکانی دیکەی هونەر ببوژێنینەوە، لە سۆران هەموو شتێک بایەخی پێدراوە جگە لە هونەر.
دەشتی عەبدولڕەحمان یەکێکە لە ئەکتەرەکانی بواری شانۆ و دەڵێت: نزیکەی ساڵێکە لەگەڵ چەند کەسێکی تردا گرووپێکی شانۆمان دامەزارندووە ، شەش مانگ زیاترە شانۆگەریەکمان ئامادە کردووە بەڵام بەهۆی هاوکاری نەکردنمانەوە نەمانتوانیوە نمایشی بکەین.
وتیشی: لەسەردەمی ڕژێمی بەعس و دوای ڕژێمی بەعسیش سۆران و ڕواندز باشترین و کاریگەرترین گرووپی شانۆیان هەبووە، کەچی ماوەی 10 ساڵە حکومەتی هەرێم و وەزارەتی ڕۆشنبیری هاوکاری کۆمەڵە و گرووپە هونەریەکانیان بڕیوە و ڕێگە نادەن هونەردۆستان کارە هونەرییەکانیان ئەنجام بدەن.
دەشڵێت: ئێمە دەستمان بە کاری هونەریی کردووەتەوە و ناوەستین، هاوکاری بکرێین یان نا لە کارکردن ناوەستین و سۆران ئاشنا دەکەینەوە بە هونەری شانۆ و مۆسیقا و شێوەکاریی .
باپیر ڕواندزی بەڕێوەبەری بەڕێوەبەرایەتی هونەر و ڕۆشنبیری سۆران سەبارەت بە نەبوونی چالاکی هونەری بەتایبەت نەبوونی شانۆ لە سۆران بە ڕۆژنیوزی وت: پێم وایە ڕەوشی هونەر بەگشتی لە کوردستان سسستە و لەقەیراندایە، ئەمەش بە پلەی یەکەم دەگەڕێتەوە بۆ نەبوونی پارە و هاوکاری وەزارەتی ڕۆشنبیریی بۆ هونەرمەندان و سەنتەر و کۆمەڵە هونەریی و ڕۆشنبیرییەکان.
وتیشی: ئێمە بەرنامەمان هەیە لە سۆران دەست بکەینەوە بە چالاکی هونەریی و ڕۆشنبیریی، بەم نزیکانەش شانۆگەرییەک لە سۆران ئەنجام دەدەین و خەڵکی شارەکەمان ئاشنا دەکەینەوە بە بوارە جیاوازەکانی هونەر و ئەدەب و ڕۆشنبیریی.
سۆران ئیدارەی سەربەخۆیە و لە شەش شارۆچکە پێکهاتووە، ژمارەی دانیشتووانی نزیک دەبێتەوە لە 500 هەزار کەس، بەڵام کەمترین چالاکی هونەریی و ڕۆشنبیریی تێدا ئەنجام دەدرێت، ئەمەش هونەرمەند و ڕۆشنبیرانی نیگەران کردووە و پێیان وایە بەدەستی ئەنقەست بواری هونەری لەشارەکەدا فەرامۆش و بێبایەخ کراوە.[1]