ناو: ئاسۆ
نازناو: ئاسۆ عومەر سوارە
ناوی باوک: #عومەر حاجی محەمەد قوربانی#
ساڵی لەدایکبوون: 1964
ڕۆژی کۆچی دوایی: #30-12-2019#
شوێنی لەدایکبوون: #سلێمانی#
شوێنی کۆچی دوایی: سلێمانی
$ژیاننامە$
ئاسۆ عومەر سوارە هونەرمەند و نووسەر و میدیاکارێکی ناسراوی کوردستان بوو، لەرشتەکانی شانۆ و سینەما و دراما و نووسین و میدیا و ئارشیف خزمەتێکی زۆری بە گەل و نیشتمانەکەی کرد و لەو بوارانەدا شوێن پەنجەی ڕەنگینی دیارە. ئاسۆ عومەر حاجی محەمەد قوربانی ناوی تەواوی ئەو کەسایەتییە کولتوورییە و بەئاسۆ عومەر سوارە ناسراوە.
=KTML_ImageCaption_Begin==KTML_StyleDiv=width:20%;height:20%;float:right;=KTML_ImageCaption_Target_Link=https://encrypted-tbn0.gstatic.com/images?q=tbn:ANd9GcTPpUfi0Gp0yZj46KbDnvpGgjrJRz_ro30c3w&usqp=CAU=KTML_ImageCaption_Title=ئاسۆ عومەر سوارە=KTML_ImageCaption_CaptionStyle=000000=KTML_ImageCaption_Caption=ئاسۆ عومەر سوارە=KTML_ImageCaption_End=
ئەو لە ساڵی 1964 سەدەی ڕابردوو لە شاری سلێمانی لەدایک بووە.
بەڕەچەڵەک خەڵکی شاری #پێنجوین#ی دڵگیرن، بەڵام خانەوادەکەی لە دوای بوومەلەرزەکەی ساڵی 1946ی شارۆچکەی پێنجوینەوە ئەو شارۆچکەیەیان بەجێهێشت و لە شاری سلێمانی گیرسانەوە.
ئاسۆ قۆناغەکانی خوێندنی سەرەتایی و ناوەندی و ئامادەیی لە شاری سلێمانی تەواوکرد، دواتر لەپەیمانگەی تەکنیکی بەغدا بڕوانامەی دبلۆمی لە بواری کارگێڕی بەدەستهێنا.
هێشتا خوێندکاری قۆناغی سەرەتایی بووە، کە خولیای هونەر بووە و بەو تەمەنەوە بووەتە جیگای سەرنجی مامۆستاکانی هونەری قوتابخانەکەی و بووەتە جێگەی بایەخیان و پێی سەرسام بوون.
لە قۆناغی ناوەندی توانا هونەرییەکەی زیاتر دەرکەتوووە و هەر بۆیەش تیپی هونەری لاوانی سلێمانی بەشانازییەوە بەئەندام وەریانگرتووە و ئەندامێکی چالاک و زرنگیان بووە.
ساڵی 1979 کە تەمەنی 15 ساڵ بووە، لەشانۆگەری (دڵدارانی باران) لە فیستڤاڵێکدا لە شاری #هەولێر# بەشداری کردووە و وەک ئەکتەرێکی کارامە و بەسەلیقە بووەتە جێگەی سەرنجی ئامادەبوانی نمایشەکە.
ئاسۆ عومەر سوارەی هونەرمەندی فرە بەهرە، لە دوای ڕاپەڕین زیاتر دەرکەوت و بووە ئەستێرەیەکی دیاری بواری هونەر و میدیا و بەهۆی کارە جوان و ناوازەکانی لەناو دڵ و دەروونی خەڵکی کوردستاندا جێگەی خۆی کردەوە و خۆشەویستی هەمووان بوو.
ئەو وەک هونەرمەندێکی بەئەزموون و قاڵبووی هونەر لەرشتەکانی شانۆ و دراما و سینەما چەندین بەرهەمی جوان و ناوازەی پێشکەش کرد و لەترۆپکی ئەو هونەرانەوە زیاتر ناسرا.
ئەو بەشداری لەدەیان کاری هونەریدا کردووە و درامای گەردەلول و فیلمی ژانی گەل نموونەی دووکاری هونەری بەرزی ئەون و ئاسۆیان لە لوتکەدا نیشان دا.
ئاسۆ لە بواری میدیاشدا ڕۆڵێکی دیاری بینی و بەتوانایەکی بەرزی هونەری و ڕۆشنبیرییەوە، چەند بەرنامەیەکی ڕەنگینی پێشکەش کرد، بەرنامەی پێشبڕکێی تەلەڤزیۆنی گەلی کوردستان و بەرنامەی وێنەکانی دوێنێی کەناڵی کوردسات دوو بەرنامەی زیندوو بوون و شاهیدی توانای بەرزی هونەری و ڕووناکبیری ئەو بوون و بینەرێکی زۆری بۆ ئەو دوو کەناڵە کێش کردبوو.

ساڵانێکی زۆریش لەبنکەی ئەدەبی و ڕووناکبیریی گەلاوێژ لە بواری کارگێڕی و ڕۆشنبیری خزمەتی کرد و زۆربەی فیستڤاڵەکانی ئەو بنکەیەی وەک پێشکەشکارێکی بەئەزموون و سەرکەش بەڕێوە ئەبرد. ئاسۆ لە بواری نووسینیشدا خاوەنی خامەیەکی ڕەنگین و سەنگین بوو، پەرتووکەکانی (پێنجوێن مەملەکەتی گوڵەزەردە) و (سلێمانی و خاکی) دوو شاکاری مەزن ئەون و مێژووی پێنجوێن و سلێمانی لەدوو پەرتووکی دۆکۆمێنتاری و ئەرشیفی بەرجەستە کردووە.
[1]
(سنوور) و (ڕەبەن) ناوونیشانی دوو پڕۆژەی نووسراوی دیکەی هونەری ئەو بوون، مەرگ دەرفەتی نەدا بەچاوی خۆی بیانبینێ.
کاکە ئاسۆ پیاوێکی دڵسۆز و نیشتمانپەروەر بوو، هەر لەسەرەتای گەنجییەوە تێکەڵاوی جووڵانەوەی سیاسی بوو، لەنێو ڕیزەکانی یەکێتیی نیشتمانیی کوردستاندا خەباتی لە دژی ڕژێمی بەعس کرد و بەهۆی هەڵوێستە سیاسییەکانییەوە تووشی گرتن و ئەشکەنجە و ئازاردان بووەوە و چەند ساڵێکی تەمەنی لاوی لە زیندانی فاشیستەکانی بەغدا بەسەر برد و لەکەناری مردن گەڕایەوە و سەربەزرانە بەلێبوردنی گشتیی ساڵی 1988 ئازاد کرا.
بەداخ و پەژارەیەکی زۆرەوە، ئەم هونەرمەندە بەتوانا و فرە بەهرەیە، ڕۆژی 30ی کانوونی یەکەمی 2019 بە نەخۆشی جەڵتەی دڵ کۆچی دوایی کرد و لەرێورەسمێکی میللی و ڕەسمیدا لەگردی سەیوانی شاری سلێمانی بەخاکی نیشتمان سپێردرا.