ساڵێوە پەڕ جە جەنگ و ئاژاولا
وەڵ جە گردچیەنە ئاواتەوازوو ساڵیە دوور جە جەنگ و ئاوارەگی و ئەورایی و نەڎامەتی و مەینەتی پەی گلێرگەو ئانزانیەتینا جە تەماموو دنیاینە. بە ھیوانا کە ساڵەی تازێ فرە چېوېش جە ساڵەی وېیەردێ نەشا. ھەرپاسە ئاواتەوازوو لەشساقی و وەشبەختی و سەرکۆتەینا پەی شمەی ئازیزی چەنی خانەوادە و کەسوکاری بەڕېزیتا.
ساڵەی وېیەردێ یوە جە ساڵە مەینەتبارەکاو ئی سەڎەیە بۍ پەی کۊمەڵگاو ئانزانیەتی. جەنگی یانەۋېرانکەروو پووتینی دژ بە خەڵکوو ئۆکراینی جە ساڵەی وېیەردێچەنە درێژەش پەنە دریا. جەنگوو فەلەستینیەکا و دەوڵەتوو ئیسراییلی جە مانگە ئۆکتۆبری بە ھێڕشە تێرۆریستیەکەو ڕېکوزیاو حەماسی پەی وەڵاتوو ئیسرائیلی دەسش پەنە کەرد. ئاکاموو ئی شەڕە کەم ۋېنەیە تاکو ئیسە کوشتەی زیاتەر جە (20000) فەلەستینیان کە فرەتەرشا خەڵکی مەدەنی و فەقیر و هەژاری بێتاوانەن. زیاتەر جە (7000) زاڕۆڵێ و کورپێ ساوای فەلەستینیێ چی جەنگەنە پەلپەلێ بیێ و جە ئاوات و ئارەزوەکاو دنیاو زاڕۆلەیشا بێبەشێ بیێ و چەنی ئاواتە پاکەکاشا کریای چېروو خاکیەو.
بۍ گومان مافوو وەڵاتوو ئیسرائیلین کە وېش و خەڵکی ئاسایی و بۍ تاوانیش وەرانوەروو هێڕشی دڕندانەو حەماسی پارێزنۆ، بەڵام ئانە کە ئەرتەشوو ئیسراییلی سەرو خەڵکی بێتاوانوو فەلەستینیەرە مارۆش، هیچ پاساویەش پەی نېیەن و بەپاو یاسا میادەوڵەیتیەکا پەی یاساو بار و دۊخوو جەنگی، کۊمەڵکوشین جە عانوو جەنگینە و ملۆ چوارچېوەو تاوانکاری جەنگی و مەحکوومەن. پەی ئی تاوانکاریە وەڵ جە گردلایەنە دەوڵەتە ڕاسڕەوەکەو نەتانیاهۆی و سەرکردەکاو حەماسی وەرپەرسێ و تاوانبارێنێ و مشۊ بەیۆوە و پېسەو یۆی دریا بە دادگاو تاوانباراو جەنگی.
فرە پەیوازەن کە پاڵو جەنگوو ئۆکراینی و فەلەستینېیەنە جەنگوو ئەردۆغانی فاشیستی و سپا تاوانبارەکەیش دژ بە کوردەکاو ڕۊژئاوای جە ویر نەشۆنە و جە قاو دریۆ و ئیدانەیچ کریۆ. ئەردۆغان و سپا تاوانبارەکەش بە ئاشکرا و وەرانوەروو ویروڕاو گردی جەهانییەو جەنگێوی دڕندانەشا دەس پەنە کەردەنەو و ڕۊ نېیەن خەڵکی مەدەنی و زاڕٶڵێ نەبا بە قوربانی تاوانکای سەرکردە هەقەتینەکەو داعشی. ئەردۆغانی فاشیست جیا جە کۊمەڵکوشی خەڵکی مەدەنی، بنەما ئابووی و تەندروستی و هونەریەکاو هەرېموو وێڕاوەبەروو ڕۊژئاوایش کەردێنی ئامانج و بۍ بەزەیانە کاولشا کەرۊ. ئی هێڕشە دڕندانەو ئەردۆغانی و سپا تاوانبارەکەیش بۍ گومان ملۆ چوارچېوەو تاوانکاری جەنگی و یاگێشا دادگاو تاوانباراو جەنگین.
پاڵو نەڎامەتوو جەنگینە گلێرگەو ئانزانیەتی جە ساڵەی وېیەردێنە پېسەو ساڵەکاتەری شاهێڎوو پاشێلکاری مافەکاو ئانزانی بۍ جە بەشێوی فرەو وەڵاتاو دنیاینە. یۊ چی وەڵاتا پاشێلکارا ئێران بۍ کە دەوڵەتە ناڕەوا و دیکتاتەورەکەش هەرپاسە بەردەوام بۍ جە کوشت و بڕوو جیاویرا و ماف وازاو نەتەوەبندەسەکاو ئێرانی.
قەیرانەو ئابووری، پېسەو گرانی، بۍ هەرمانی، خراوتەربېیەی خزمەتگوزاری، گەندەڵی، هەژاری چینە بۍ دەسەڵاتەکاو پەراوێزوو کۊمەڵگای بە زەقی جە ساڵەی وېیەردێنە کەوتە بەرەو و هەرپاسە بۍ ڕاچار مەنێنەوە.
یاگێ وېشەنە کە بە درووشمەو نا پەی جەنگ و تاوانباری جەنگی دژ بە خەڵکی مەدەنی و ژەن و زاڕۆی بێتاوانی، بەڵۍ پەی ئاشتی و ئاشتەوایی جە گردو دنیاینە و بەڵۍ بەی دادگایی کەردەی گردو تاوانباراو جەنگی جە ساڵەو (2023)ێنە بلمی پیرای ساڵەی تازێوە.
موختار کەریمی.[1]