دوای ئەوەی 39 پەرلەمانتار یاداشتێکیان ئاراستەی سەرۆکایەتی پەرلەمانی کوردستان کرد سەبارەت بەزیادبونی نائاسایی لەژمارەی دەنگدەرانی هەردو پارێزگای هەولێرو دهۆک، دواتر لیژنەیەکی پەرلەمانی بۆ بەداچون بۆ ئەو مەبەستە پێکهێنراو لەماوەی 18 ڕۆژی کاری لیژنەکەدا، لیژنەکە گەیشتە ئەم ئەنجام و ڕاسپاردانە:
دەرەنجامەکان:
لیژنە لەئاکامی لێکۆڵینەوەکانیدا گەیشتە ئەم دەرەنجامانەی خوارەوە:
1 – کۆمسیۆن باڵای سەربەخۆی هەڵبژاردنەکان تەنیا زانیاری پێویستی (440) کەسی مردووی لایە بۆ سڕینەوە کە کەس و کاریان سەردانی بنکەکانی نوێکردنەوەی تۆماری دەنگدەرانیان کردووە، بۆ سڕینەوەی ناوەکانیان لە کاتێکدا ژمارەی مردووان بە پێی ئاماری وەزارەتی تەندروستی هەرێم (82.930) کەسە لەساڵی (2009) تا مانگی (5) ی (2013) مردوون. وە بەپێی هەمان ئامار لە ساڵی (2001-2008) ژمارەی مردووان (95.655) کەسە.
2 – لەسەر ئاستی عێراق و هەرێمی کوردستان ناوی لێکچوو زۆرە و بەپێ ی نووسراوی کۆمسیۆن لە تۆماری دەنگدەران (1.828.691)ناوی لێکچوو لەسەر ئاستی عیراق هەیە، وەبەپێی گوتەی کۆمسیۆنیش ئەو (94000) ناوەی (39)پەرلەمانتارەکە بەسیدی و لەڕێگەی یادداشتێکەوە پێشکەشیان کردبوو لە نیوان پارێزگەکانی (هەولیر/دهۆک) لەگەل (موسل/کەرکووک)، لەگەل ژمارەی (80.487) کەس کە بەڕێز سەربەست ئامێدی لە 2 01-07-2013 بە ئیمەیل بۆ لیژنەی ناردووە لەنێوان پارێزگاکانی (سلێمانی) لەگەل (کەرکووک/تکریت/دیالە)، کۆمسیۆن بەناوی لێکچویان دادەنێت.
3-ناوی دووبارە لە تۆماری دەنگدەرانی هەرێم دا هەیە، و بەپێ ی گوتەی خودی کۆمسیۆنیش لە کۆبوونەوەی (16/7) لەگەڵ لیژنە ناوی (645) دەنگدەر دووبارەیە و تا تۆماری دەنگدەرانیش لە قۆناغی شیکردنەوە تەواو دەبێت ئەگەری زیادبوونیش هەیە.
4- نەبوونی میکانیزمی گونجاو و پێویست لە نێوان دەستەی هەڵبژاردنەکانی هەرێم و لایەنە پەیوەندیدارەکانی هەرێم بۆ نوێکردنەوەی تۆماری دەنگدەران.
راسپاردەکان:
لیژنە ئەم ڕاسپاردانەی خوارەوەی هەیە :
1 – چارەسەرکردنی ناوی لێکچوو.
2 – سڕینەوەی ناوی دووبارە.
3 – سڕینەوەی ناوی مردووان.
4 – ئەنجامدانی سەرژمێری گشتی لە عێراق.
5 – دانانی میکانیزمی گونجاو بۆ کارکردنی وەزارەتەکانی حکومەتی هەرێمی کوردستان بە گۆڕینەوەی زانیاری تەواو بە مەبەستی نوێکردنەوە و بوونی تۆماری دەنگدەرانی پاک.
6 – دانانی میکانیزمێکی گونجاو بە هەماهەنگی لەنێوان سەرۆکایەتی پەرلەمانی کوردستان و کۆمسیۆنی باڵای سەربەخۆی هەڵبژاردنەکان بۆ ووردبینی کردن و سڕینەوەی ناوی ئەوکەسانەی کە مافی دەنگدانیان نییە (مردوو و دووبارە).
7 – پەیڕەوکردنی سیستەمی ئەلیکتڕۆنی لە ئەنجامدانی پرۆسەی هەڵبژاردنەکاندا.
ئەم لیژنەیە بەبڕیاری ژمارە 1ی سەرۆکایەتی پەرلەمان لەڕۆژی 07-07-2013 پێکهێنرا کە لە 9 ئەندام لەفراکسیۆنە جیاوازەکانی پەرلەمان پێکهاتبو، لەڕۆژی 08-07-2013وە ڕۆژانە نزیکەی 6-7 سەعات دیدار و کۆبونەوەی بەردەوامیان لەگەڵ کۆمسیۆنی باڵای سەربەخۆی هەڵبژاردنەکان و وەزارەتی بازرگانی و لایەنە پەیوەندیدراەکان کردووه و سەردانی مەیدانیشیان بۆ دەستەی هەڵبژاردن و وەزارەتی تەندروستی و بەڕێوەبەرایەتی گشتیی ڕەگەزنامە بۆ ئەم مەبەستە ئەنجامداوە.
- 30-07-2013