کەس قەباڵۍ کەسی نمەوانۊوە
ڤەباڵۍ، پارچە وەرەقێ، یام پارچە پۊسێ بېیەن هەکە نویستێوەش چەنە تۊمارکریانو لوول کریان، کیانیان پەی کەسێ یام پەی دەسڵاتدارێ، ئیتر کە یاوان دەسش کەردەنشۆو ۋانانشۆ.
پېسە ئیدیۆمێ بەکارئامان پەی حاڵەتو پاشاگەردانی و کەس بە کەسی. پەی نمونەی دلۍ خانەوادێنە گرفتێ ڕوە مڎۊ، جیاتی ئانەی کەسێ یام چن کەسێ ئاقڵېشا نیشارەو گرفتەکەی چارە کەران، گرڎکەس پەی وېش قسۍ کەرۊن و وەرنیارۍ کەرۊن، ئیتر کەس گۊش پەی کەسی نمەگېرۊن. یام دلۍ وەڵاتێ فرە حزبی و فرە دەسەڵاتینە کەس مل نمەڎۊ پەی کەسی، هەریۊ دەسەڵاتش پەی وېش گەرەکەن، قەباڵی ئەوی تەری نمەوانۊوە، هەر پەوکەی واتەنشا، بە خوڎا برا پاشاگەردانېیەن، کەس قەباڵۍ کەسی نمەوانۊوە.
یانی کەس گۊش پەی وەراوەرەکەیش نمەگېرۊ، گرڎکەسێ بە ئەقڵو وېش جمۊوە، نیازێ وېشانەش هەن. ئانەیچە خانەواڎەی یام وەڵاتی ڕوەو وېرانی و هۊروەشنای بەرۊن.[1]