ناونیشانی بابەت: ئێمە هەین
ئامادەکردن: #زکرى موسا#
“هەرێم هەرچییەک بێت کارتۆنی نییە”
ئەوە هەرێمی کوردستانی ئێراق بوو بە خوێنی ڕۆڵەکانی، ئەفسانەی داعشی تێکشکاند و بە خوێنی پیرۆز و پڕبەهای ڕۆڵەکانی، جیهانی لە دێوزمەی تیرۆر پاراست. هەرێمی کوردستان لە شەڕی داعشدا 2000 شەهید و 12000 برینداری پێشکەشی مرۆڤایەتی کرد و وانەی جەنگاوەری و خۆبەدەستەوەنەدانی دووپات کردەوە.
لەو کاتەی ئێراق لە جەنگی تاییفەگەری و دەسوەردانی دەرەکی و وێرانیی تیرۆردا ڕۆچووبوو، هەرێمی کوردستان باوەشی بۆ ملیۆنان ئاوارە کردەوە و ڕێگەی نەدا هزری تیرۆر و تایفەگەری لە کوردستاندا هیچ پێگە و شوێنی هەبێت.
هەرێمی کوردستان هەرچییەک بێت کارتۆنی نییە. بەرهەمی خەباتێکی دوورودرێژی میللەتێکی مەزڵوومە کە کۆیلایەتی و ستەم و نکۆڵیکاری ڕەتکردەوە.
ئەوە هەرێمی کوردستانی ئێراق بوو کە بوویە سەکۆیەک بۆ ئازادکردنی ئێراق لە تەونی دیکتاتۆری و شۆڤێنیزم و نەزانی و دواکەوتوویی.
هەرێمی کوردستانی ئێراق هەرچۆنێک بێت و هەرچییەک بێت بە فەرسەخ لە پێشەوەی ڕژێمە سەرکوتکار و ژنکوژ و ئازادیکوژەکانی دەوروبەرە.
گەلانی ناوچەکە ماوەی سەت ساڵە قوربانیی دەستی دەوڵەتە کارتۆنی و قەڵپەکانی ناوچەکەن، سەت ساڵە زیندانیی سیستەمە سەرکوتکارە نائینسانییەکانی ناوچەکەن.
ئەو دەوڵەتانەی دەوڵەتەن و سیادەیان هەیە و کورسی و نوێنەریان لە ڕێکخراوی نەتەوە یەکگرتووەکاندا هەیە، لەبری کارکردن بۆ ئاشتی و بەها بەرزەکانی مرۆڤایەتی و پێشکەوتن، کاریان بۆ شەڕ و کاولکاری و تێکشکاندنی کەرامەتی مرۆڤەکان کرد.
ئێمە دانیشتووی سەرزەمینێکین کە بە زۆر دابەش کراوە و جینۆساید کراوە و یاسا نێودەوڵەتییەکان ڕەوایەتیان داوەتە ئەو زوڵم و دابەشکارییە. بەڵام بەڕووی ئەو زوڵمەدا هاتینەوە و ڕێگەمان نەدا نەخشەی شوومی لەناوبردن و نەهێشتنمان سەر بگرێ.
هەرێم هەرچییەک بێت کارتۆنی نییە، بەڵکوو خاوەنی پێناسە و مێژوو و ڕەسەنایەتییە. هەرێمی کوردستانی ئێراق ناڕووخێ چونکە ڕیشەی لە مێژوو و خەبات و کۆڵنەدانی خەڵکەکەیدا هەیە.
هەرێمی کوردستانی ئێراق وەکوو هەموو شوێنێکی تری سەر زەوی خاوەنی کەرامەت و ئیرادە و خەونە و لە هەمانکاتیشدا گرفتیشی هەیە. دانیشتووانی هەرێمی کوردستانی ئێراق ژیر و پێگەیشتوو و خاوەن مافن و تێکۆشەرن و مێژوویان تۆمار کردووە و بەشێکن لە شانازیی مرۆڤایەتی. دەتوانن بە هیمەت و بەردەوامیی و کۆڵنەدان کێشەکانیان چارەسەر بکەن. بە کارتۆنی ناوهێنانی هەرێم هیچ جیاوازییەکی نییە لەو ڕوانگەیەی داگیرکاران و ستەمکارانی ناوچەکە بەرانبەر ناوی کوردستاندا هەیانە.
ڕاستە ئێمە وەک زۆربەی وڵاتانی تر کێشەمان لە پێگەیشتن و پێکەوەهەڵکردن و ئیدارەدان و بنیاتنانی دامەزراوەکاندا هەیە، بەڵام لەگەڵ هەموو ئەوانەیشدا هەین و ناکرێ نکۆڵی لە بوونمان بکرێت. [1]