$گەڕانەوەی پارتی بۆ بەغدا$
#هێڤیدار ئەحمەد#
#01-01-2020#
پارتی دوای 2003 و بەتایبەت دوای یەکەم هەڵبژاردنەکانی ساڵی 2005ی ئێراق، چاوی لە هەرێمی کوردستان بوو، بەغدای بۆ یەکێتی بەجێهێشت، ئەوەبوو #مام جەلال# بووە سەرۆک کۆماری ئێراق بۆ دوو خول و بارزانی بوو بە سەرۆکی هەرێمی کوردستان بۆ دوو خول. پارتی لەمەدا سوودی بینی یان زەرەری کرد؟ لە ڕێی ڕووداوە واقعییەکان وەڵامی ئەوە دەدەمەوە کە پارتی سوودی لەمە بینیوە یان زەرەری کردووە؟
مام جەلال بوو بە سەرۆکی ئێراق و بارزانی و پارتی بە هەموو هێزی خۆیان پاڵپشتییان کرد لە بەغدا تا سەرکەوتوو بن و پەیوەندییەکی بەهێز لەگەڵ لایەنە شیعییەکان درووستبکەن. بەڵام ئەمە وەکوو سیحرێک بەسەر پارتیدا شکایەوە، یەکێتی لە بەغدا لەگەڵ شیعەکان و (ئێرانیش) پێکەوە بوونە جەمسەرێکی بەهێز بەرانبەر بە پارتی و سوننەکان.
یەکێتی لەڕووی ماددیشەوە دوو جار قازانجی کرد، هەم لە بەغدا شەریک بوو، چەندین پڕۆژەی وەبەرهێنان و ماڵ و موڵکیان بەدەستهێنا، جگە لە سەفقاتی گەورە، لە هەرێمی کوردستانیش هەتاوەکوو ئێستا 47%ی بودجە و داهاتی هەرێمی کوردستان دەبات.
پارتی پێیوابوو لە #هەولێر#ەوە دەتوانێ بە بەغدا بڵێ من شەریکم، بەڵام ڕاستییەکە ئەوەیە دەبێ لەنێو بەغدا شەریک بی و بەغدا چۆڵ نەکرێ. کاتێ پارتی لە بەغدابێ، بڕیاری هەرێمی کوردستان و بۆ هەرێمی کوردستان بەهێز دەبێ، پێچەوانەی یەکێتی کە بەغدای بۆ بەهێزکردنی پێگەی خۆی و هەندێ جار بۆ لێدانی هەرێمی کوردستان بەکارهێناوە.
بەڕای خۆم، تاوەکوو ئەو ڕۆژەی هەرێمی کوردستان لە ئێراق جیادەبێتەوە و سەربەخۆ دەبێ، پارتی دیموکراتی کوردستان دەبێ پێیەکی بەهێزی لە بەغدا بێ و دۆستی شیعەکان بێ. بەغدا تەنیا شوێنی پۆستێکی وەزاری و چەند کورسییەکی پەڕڵەمانی و وەرگرتنی بودجە نییە، شوێنی بڕیاری کۆتاییە و بڕیاری بەهێز هەر دەبێ لەوێ بدرێت. ئەوەتا بەغدا بۆ (ئەمریکا، بەریتانیا، تورکیا، ئێران، سعودیە، ئیمارات، قەتەر و نەتەوە یەکگرتووەکان و هەموو دنیا گرینگە) ئەی بۆ بۆ پارتی گرینگ نەبێ!
پۆڵ بریمەر لە یاداشتەکانی خۆیدا لەبارەی ئەو ماوەیەی لە ئێراق بووە، لەبارەی بارزانی نووسیویەتی: هەرکاتێ قسەوباس دەهاتە سەر مافی کورد، بەتایبەت لە مەسەی نووسینەوەی دەستوور و هێزی پێشمەرگە، بارزانی دەیگوت ئەگەر مافی ئێمە بخورێ، دەگەڕێینەوە کوردستان بریمەر باسی هیچ سەرکردەیەکی دیکەی کوردی نەکردووە کە لەسەر مافی کورد ئەو هەڵوێستەی بارزانیی هەبووبێ. ئەمەش دەرخەری ئەوەیە کاتێ لە بەغدابی، ڕێگە نادەی مافی هەرێمی کوردستان پێشێل بکرێ، ئەمەش بە هەموو کەس ناکرێ، تەنیا بەوە دەکرێ کە بریمەر بە ڕاست و درووستی وەسفی کردووە.
لە بەغدای دوای 2003 دا دوو بڕیاری جەرگبڕ لە دژی هەرێمی کوردستان درا، هەردوو جاریش بەهۆی غیابی بارزانی و پارتی بووە لە بەغدا، یەکەمیان ساڵی 2012 بوو کاتێ کورد سەرکردایەتی مەسەلەی سەندنەوەی متمانەی لە نووری مالیکی کرد و یەکێتی لە دوا ساتەکاندا شکستی پێهێنا، ئەمەش بووە هۆی سەرەتای لێدان لە پێگەی هەرێمی کوردستان لەلایەن بەغداوە، دووەم جاریش 5 ڕۆژ پێش ڕووداوەکانی 16ی ئۆکتۆبەر بوو کە نەیارەکانی کورد پیلانی لێدانی هەرێمی کوردستانیان داڕشت.
لە هەردوو بڕیاردا، هەرێمی کوردستان و پارتی زەرەری پێگەیشت، بەڵام یەکێتی هەروەک خۆی مایەوە و بگرە قازانجی کرد.
پارتی لەنێو سنووری دەوڵەتی ئێراقدا دەکرێ دوو ناوەندی درووستکردنی بڕیاری هەبێ، یەکێک لە هەولێر و ئەوەی دووەمیش لە بەغدا، ناکرێ لەو هەموو گۆڕانکارییانەی لە بەغدا ڕوو دەدەن، پارتی ئەکتەرێکی ڕاستەقینە و سەرەکی نەبێ. بۆیە پێویستە ئەم جارە پارتی بەهێزەوە لە بەغدا بێ، تاوەکوو ڕێگە لە داڕشتنی پیلانێکی دیکە لە دژی هەرێمی کوردستان بگرێ. [1]