بنەچەو بەگزاڎەکا هۆرامانی
بەشۊ چواردەهەمۍ

هەسەن سان:
یۊن جە سانە نامدارەکا هۊرامانی، کوڕو (محەمەد سانی یەکەم) یەن، دمای کوچی دمایینو تاتەیش ساڵەو (1265ک/1848ز) بېیەن بە حوکمڕانو (تەخت و ڕەزاوی) ، دەربارەو ئی سانەیە چن سەرچەمێ تاریخینە قسەوباس ۋزیان ڕوە، پاسە باسشکەران کە (هەسەن سان) کەسێ دیارو وەرجەسەو سەردەمو قاجاریەکا بییەن، ڕیزو ئەۋەڵینو پېیا ئێرانیەکانە بییەن، تەنیا کەسێن کە دلۍ سەرەک خېڵ و کەسایەتییە ئەشناسیاکا سنە و کرماشان و وەرنیشتو ئێرانینە، (مەهدی بامداد) دلۍ تاریخو پېیا ئێرانیەکانە نامېش ئاردەن .
تاریخو ژیوای ئی کەڵەپیایە پەڕەن جە سەربەرزی و قارەمانی، هەرگیز سەرەش وەردەمو داگیرکەرانە شۊڕ نەکەردەن، هەر بە سەربەرزیچ گېیانش بەخشان، کۊششش کەردەن یەکیەتی و پېوەرەژیوای مېیانو حوکمڕانەکا هۆرامانو لهونینە وەشکەرۊن کە هیچ داگیرکارێ زاتش نەبۊن زەفەرشان پەنە بەرۊن.
بیارایی و چەمنەتەرسای هەسەن سانی، بېیەن بەمایەو سەرهۊردای ناکۊکیی فرە گۆرەی مېیانو حوکمڕانەکا هۆرامانی و دەسەڵاتدارەکا دۆڵەتو قاجارینە، کە چڼین جەنگۍ ۋناویېش چەنە کۊتېنێ، ئا جەنگۍ هەرچن جە لاو دەسەڵاتداراوە بە جەنگگېزی و بەرشېیەی جە یاسای و سووکایەتی بە پایەو شای دریێنۍ قەڵەم، بەڵام جە ڕاسینە ئا جەنگۍ خېزیێ گۆرۍ و کۊششۍ نەتەوەیۍ بیېنۍ دژ بە داگیرکەرا نەتەوەکەیمان، کە چن تاریخ نویسێ ڕاسواچۍ ئا ڕاسیەسا ۋستەن ڕوۋە.[1]