باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و نەوەڎهەمە
وەختێ (بریدە) ئیمانش ئارد چەنی حەفتا نەفەرەکەیش، پېخامئاوەرو ئیسلامی دڵشاڎ بیی، ئەبووبەکر شوکرانەو خوڎایش کەرد، بریدە کەژاوەکۍ وېش وستە خزمەتو حەزرەتی، گردشان ڕوەو مەدینە بە لەبەیک لەبەیک جمێرە، مەواتشان یا ڕەسوول سەلامون عەلەیک.
فیراری قوڕەیش قەومی پەڕ کینەم
ئیستە ها عازم موڵکی مەدینەم
(بریدە) دەرسات ئیمانش ئاوەرد
ئیقرار بە خوڎا و بە پېغەممەر کەرد
دینی ئیسلامش قبووڵ کەرد بە دڵ
بە ئایەی قورئان تەسدیق کەرد حاسڵ
باقی یارانش ئەو حەفتاد نەفەر
ئیمان ئاوەردەن گرد بە پېغممەر
ئیقرار بە خوڎای واحید کەردشان
سوجدە زاتی پاک مەعبوود بەردشان
یارانی حەزرەت ئەو شەو وە شاڎیی
ویاران وە زەوق بەزمی ئازادیی
بووبەکری سیدیق سەحابەی سەروەر
کەردەن شوکری زات دەهەندەی داوەر
سەحەر وە تەوفیق بۍ هەمتای وەهاب
خورشید بەرئاما جە پەردەی ئافتاب
(بریدە) عەرز کەرد یا خەیرەلئەنام
یەک عەرز داروون وە سەرگەردت بام
هەنی بۍ عیلم جەی سەرزەمینە
تەشریفی خەیرت مەبەر مەدینە
تا دەستاری وېش شېونا جە سەر
کەردش وە بەیداغ پەرێ پېغەممەر
وېش هورگرت عەلەم ئەژدیهای پەیکەر
سەڵەوات دا بە ڕووی موستەفای سەروەر
ڕاگەی مەدینە گرتشان نە وەر
بڵند بیی سەدای ئەڵڵاهوئەکبەر
کەش و کۊ و کەمەر سارا و بەس و کاو
سەنگ و دار و خاک خار و بار و ئاو
هەرکامێ پەی وېش وە لەبەیک لەبەیک
مەوات: یا ڕەسوول سەلامون عەلەیک.[1]