باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و چل و ششەمە
میزا ئۆلقاڎرو پاوەی بەردەوام ئا دیمەنېما پیشانە مڎۊ کە دین و محەمەدی ئاشرا بېیەن و ئیتر کافرو دوە ڕوەکۍ خەریکۍ دژمنایەتیشەنۍ.
یەک موو جە ئەندام ئەو مەلەک چارە
نمەدەوش وە سەڎ هەزار عەمارە
ئەی مەتڵەب نە دڵ بەرکەران وە بەر
هەرگیز پەی ئەوان نمەبۊ مەیسەر
جەو دما مەتعەم بن غەزا جە نۊ
وات: ئەبو تالیب بە نەفعی پەی تۊ
وەڵڵا قەوم چەنیت سەلاحەت سازا
بە تۊ موکەددەر موبارز وازان
حورمەتی تۊشان وە جا ئاوەردەن
سەلاح هەر ئېدەن ئی کارە کەردەن
ئەبوتالیب وات: جە ئەنساف دووری
............
قەسدت هەر ئېدەن دایېم جەی کارە
چەنی قەوم ببین بە خوونەخوارە
محەمەد دایېم هەر بەرقەرار بۊ
ڕۊ جە ڕۊ فېشتەر هەر پایەدار بۊ
من هەتا زیڼەی ڕووی سەر زەمینم
هەر ئېدەن خەیاڵ ئەسڵی یەقینم
چەنی جوش وە تای ڕیشەی گیانەوە
نمەدەوش وە دەس، دوشمنانەوە
باقی ئەی مەتعەم مەعلووم بۊ وە تۊ
جە قەزاو قەدەر هەرچی مەعلووم بۊ
جەو دما قوڕەیش جە ڕووی نادانی
کەم کەم دەسکەردەن وە غەزارانی
تا بڕیا جە بەین حیلم و حەلاوەت
شەیتان مەحکەم کەرد پایەی عەداوەت
هەر قەبیلەیی جە بەرزە بانان
ئەزیەت مەدان بە موسوڵمانان
شەوان تا بە ڕۊ مەگرتەن کەمین
تا ئەهلی تاعەت هۊرگېڵا جە دین
وە بۍ بەهانە هەر مامان مەشین
دایېم هەر جەویای قەتڵی حەزرەت بین
بەڵام خوداوەند تاکی تەنیای فەرد
بە ئەبو تالیب حەزرەت مەعلووم کەرد
واتش: ئەی عەشرەت بە بۍ دڵگەردی
مەعلووم بکەن پېم مەردی و نامەردی
قەوم خەیاڵ قەتڵی محەمەد داران
نەکەن ئەی عەشرەت جە ڕوزگاران.[1]