باخچێوە بېگەرد
نویستەی: میرزا ئۆلقاڎرو پاوەی
بەشۍ: پەنجا و حۆتەمە
وەهەب، کوڕو عەبدولمەنافی جە شکارگاو وېشەنە، وەختێ دیش چن سەڎ سوارێ چواردۆرو عەبدوڵڵایشان دان، بە پەلە ئاما، عەینو وەختینە، دیش چڼ سەڎ سوارێ جەنگییۍ و پۊشتۍ، پەی ڕزگارکەردەی عەبدوڵڵای وەستېرە وار، سوپاو یەهوودیشان تارومار کەردەو عەبدوڵڵاشان ڕزگارکەرد، ئیتر بە پەلە هۊرئېزاو پەی لاو (عەبدولموتەلیبی) گېڵاوە، پەی ئانەی هەواڵەکەش پەنە بڎۊ. وەهەب واتش من کناچۍوەم هەنە پېسەنە گوڵو باخێ ڕەنگینی، بە عەبدوڵڵایش مەبەخشوو. چوونکوم ئاڎ زانۍ عەبدوڵڵا دمای وېش کۍ جیامازۊ:
دەر دەم، هۊرئېزا، فەوری تەشریف بەرد
گفتوگوی وەهەب، پەی (موتەلیب) بەرد
واتش: گوڵێ هەن، جە گوڵزاری من
نە باغچەی، عیسمەت، کەس نەداری من
پاکی، بېعەیبەن، نۊبەر نەمامەن
شۊخی شیرینەن، (ئامین) ش نامەن
حوسنش، چوون خورشید، نە پشتی پەردەن
نە پەردەی عیزەت، دایېم، پەروەردەن
پەرۍ، هامجفتی، پەی هامخوایەی، شەو
(ئامینە) م بەخشا، بە (عەبدوڵڵا) ی، ئەو
دایەی (ئامینە)، فەوری تەشریف بەرد
عەبدولموتەلیب، خاترنیشان، کەرد
چگۊنەگی حاڵ، فەرموودەی وەهەب
عەرزکەرد، وە خزمەت، ئەو عالی نەسەب
واتش: با غەیرێ، چی سەرزەمینە
شاڎ، نەبۊ، بە دین، دیڎەی (ئامینە)
جفتش، ئەر، شاە، ئەر گەڎا بۊ
خاس ئېدەن، با ئەو، پەی عەبدوڵڵا بۊ
عەبدولموتەلیب، شای بوڵند کەوکەب
وە حوسنی، عیسمەت، ئامینەی وەهەب
وېش، موتەلیع بیی، جە، سەرەتا، قەدەم
زاهیر بیی، چوون، سەرد، سەرچەشمەی زەمزەم
قبووڵ، بەدەڵ، وات: با موبارەک بۊ
مەبۊ، کاری خەیر، جە تەدارەک، بۊ
[1]