داستانۊ شېخی سەنعانی
بەشۍ پاڼزەهەمە
شېخی سەنعان گۊشش گېرت پەی موریدو خەلیفەکاش، بەڵام ئا گرد مۊچیارییۍ و هاگادارکەردەیۍ هیچ سوودێشان نەبی، شېخی سەنعان پېسە هەورو وەهاری هەرسی چەمېشەرە تکېنېرە. ماچۊ شمە هەرزەکارېندۍ، نەزان قسېندۍ، هەڵای جە ماناو عەشقی نەیاوێندېنە، من هیچ تەرسێم جە قیامەتی نیەنە، باسو ئا ئەفسانا پەی من نمەکەردۍ. ئیتر شېخی سەنعان کەوت تاریفدای عەشقەکەیش و مەعشووقەکېش پەی موریدەکاش.
سەنعان ئېڎ ئەژنی دەروونش جۊشا
چوون سەیلی وەهار، جۊشاو خرۊشا
شېخ وات: ڕاویار، هەرزەی هەرزە گۊ
هەی هوو من جە کۊ، دینی تۊ جە کۊ
دین و ئیمانم دییەن دولبەرەن
چە پەروام، جە خۊف ڕۊژی مەحشەرەن
وەس عەزابم دەر بەشقی خوڎای وېت
بشۊ نە ڕای وېت، خەیر بەیۊ نە ڕېت
مەعلوومەن کە تۊ ئەحواڵ نەزانیی
ئەفسانەی بێ سوود، پەی من مەوانی
ئیمان یەکێ بۍ، وە بت سوپەردم
من جە خوڎاوەند، عالەم ویەردم
سوب ناڵەی ناقووس کلېسا و کەنیشت
خاستەرەن، جە دین، موسوڵمانان گشت
ماچێ جە گۊنای زوڵف عەنبەرین
خاستەرەن جە لام، جە خەلدی بەرین
جامێ بادەی مەی، جە دەستی دولبەر
خاستەرەن جە لام، جە ئاوی کەوسەر
تایێ جە کەڵاف، ئەشەد بۊی تەرسا
خاستەرەن جە لام، خەرقەی نەکیسا
من عیشقی تەرسا، نە دەروون کەفتەن
ماچی، دەروونم بڵېسەی نەفتەن
هەرکەس عېشقی یار، نە دارۊ جە سەر
ماچی کڕېوەن، جە کەرگڵۍ بەتەر
سەرم ئاشوفتەی عیشقی دولبەرەن
چە پەروام، جە دین خوڎای ئەکبەرەن
من پەرێ شېوەی مەستی ڕووی جانان
بېزارم جە دییەن، گشت موسوڵمانان
تاکە چەنی خووگ نەگېڵوو بە زار
کەی ڕەحمش مەیۊ ماهی جەهاندار
تا نەبوون جە دین، ئەحمەد هەراسان
کەی مەیۊم، بە دەس سەنەم بە ئاسان
دیارەن هەرزە، هەرزەکارەنی
بێ خەبەر جە ماڵ، گرفتارەنی
یەقین جەفای عیشق، پەنەت نەیاوان
ئەحواڵ نەزانیی، نە داری تاوان
ئېدش وات؛ ئەسرین ڕېزۊ جە سەردا
ڕووش کەرد چەنی خووگ، بەو دەشت و دەردا.[1]