سەرۆکی حکوومەتی هەرێمی کوردستان، بەبۆنەی ساڵیادی شۆڕشی ئەیلوول پەیامێکی بڵاو کردەوە و تێیدا داوای هاوهەڵوێستی و یەکدەنگی هەموو لایەن و پێکهاتەکانی کوردستان دەکات، لەپێناو داکۆکیکردن لە پاراستنی مافە دەستووری و دەستکەوتە نیشتمانییەکان.
ئەمڕۆ یەکشەممە 11-09-2022، #مەسرور بارزانی#، سەرۆکی حکوومەتی هەرێمی کوردستان، بەبۆنەی ساڵیادی بەرپابوونی شۆڕشی مەزنی ئەیلوول، پەیامێکی بڵاو وکردەوە و تێیدا هاتووە، ئەمڕۆ یادی گەورەترین شۆڕشی گەلی کوردستان دەکەینەوە کە شۆڕشی مەزنی ئەیلوولە.
ئەم شۆڕشە، وەرچەرخانێکی مێژوویی و شۆڕشێکی سەرتاسەری خەڵکی کوردستان بوو بە گشت پێکهاتە نەتەوەیی و ئاینییە جیاوازییەکانەوە، بە سەرکردایەتی ڕابەری نیشتمانیمان #مەلا مستەفا بارزانی#ی نەمر.
ئاماژەی بەوەش کردووە، یەکێک لە گرنگترین و بەهادارترین تایبەتمەندییەکانی شۆڕشی ئەیلوول، یەکڕیزی و یەکگرتوویی گەلی کوردستان بوو، کە بەهۆی خۆڕاگری و ئیرادەی بەهێزی خەڵکی کوردستان، دوژمن ناچار بوو دان بە بەشێک لە مافە نەتەوەیی و نیشتمانییە ڕەواکانی دا بنێت لە چوارچێوەی ڕێککەوتننامەی یازدەی ئادار.
هەروەها گەورەترین شوناسی شۆڕشی ئەیلوول، گۆڕینی ڕاپەرین و خەباتی ناوچەیی بوو بۆ شۆڕشێکی نیشتیمانی سەرتاسەری لە هەموو کوردستان و دروستکردنی هەستی نەتەوەیی و نیشتیمانی بوو لای هەمو هاووڵاتییانی کوردستان.
لە پەیامەکەی مەسرور بارزانیدا ئەوەش هاتووە، ئەمڕۆ کە یادی شۆڕشی مەزنی ئەیلوول دەکەینەوە، پێویستە هەموو لایەن و پێکهاتەکانی گەلی کوردستان، هاو هەڵوێست و یەکدەنگ بن لە پێناو داکۆکیکردن و پاراستنی مافە دەستووری و دەسکەوتە نیشتمانییەکانمان، کە خەڵکی کوردستان، دەیان ساڵە لە پێناویاندا خەبات دەکات و قوربانییەکی زۆری داوە.
لە کۆتایی پەیامەکەیدا سەرۆکی حکوومەتی هەرێمی کوردستان، ڕایگەیاندووە، لە ساڵیادی شۆڕشی ئەیلوولدا، بە ڕێز و پێزانینەوە، یادی هەموو پێشمەرگە و بەشدارانی ئەو شۆڕشە مەزنەی گەلی کوردستان دەکەینەوە. سڵاو لە گیانی پاکی شەهیدانی شۆڕشی ئەیلوول و سەرجەم شەهیدانی کوردستان. [1]