نامۍ: مستەفا مەڵا قوتبەدین مەڵا شەمسەدین
نازنامۍ: بېسارانی
نامۊ تاتەی: مەڵا قوتبەدین
ساڵۊ پېڎابېیەی: 1643
ساڵۊ مەرڎەی: 1701
یاگۊ پېڎابېیەی: بېساران
یاگۊ مەرڎەی: بېساران
بېسارانی ( مستەفا کوڕو مەڵا قوتبەدینی کوڕو مەڵا شەمسەدینی) ساڵۊ 1053 کۊچی (1643 یان 1644 مەسېحیی) چە دەگاو (بېساران)ی سەر بە ناوچەو (ژاۋەرۊ)ی پېڎابېیەن. ئاڎ سەرەتا لاو تاتەیشۆ و دماتەر چە نۊتشە و پایگەلان و سنە وانەو مەڵایەتیش وەنەن. دماو ھۊرگېرتەی مۊڵەتو مەڵایەتی، بەرەو بېساران گېڵانۆ و تاکو دمایی تەمەنیش، کە چە ساڵۊ (1113 کۊچی - 1701 یان 1702 مەسېحیی) کۊچی دمایینش کەرڎەن، پېسەو مەڵاو دەگاو بېسارانی مەنۊۋە و سەرو بنەماو وەسیەتو وېش چە قەبرسانو (پیرەھەژار)ی چە نزیکو (سەڵواوا)ی بە خاک ئەسپاریان.
بېسارانی ھۊنیێکېش سەرو کېشی بڕگەیی و بە ھۆرامی نۋیسیتېنۍ، ھەژمۇنېۋی فرەش سەرو ھۊنیێ کورڎیۍ و بەتایبەت ھۆرامیۍ بېیەن. پېرەمێرد بڕېۋ چە ھۊنیاکا ئاڎیش پەی سەرو سۆرانی ھۊرگېڵنێنۍ. مەولەوی چە ھۊنیاکا وېشەنە نامۊ ئاڎیش بەرڎېنە و ماچۊ:
(بېسارانی)یەن نە تۊی فەرد من خەم چەنی خەمان زۇ مەبۊ ساکن
نمۇنېۋ چە ھۊنیێ بېسارانی:
ئارۊ شېیان دیم، ڕەنگی خەزانان
حاڵی شان نېیەن، ئېمە نەزانان
دیم بە تەرزەوە خەزانێ بۍ تەرز
تەمام حاڵی وېش پەرێم کەردش عەرز
پەرسام یە چېشەن ئی زەردی خەزان
وات: مەیۊم نە خاو تەناکی تەرزان
واتم من و تۊ هەر دۇ جەستەمان
ئېش مەکەران زام مارانگەستەمان
تۊ جېیا جە تەرز، من جە باڵایێ
تەڕتەر جە نەرگس سەوڵی ئاڵایێ
داخی جېیایی نەوتۇڵ نەمامان
تۊ نە خاوت دی، من پەنەم ئامان
چڼ نمۇنېۋ چە سەردېڕۍ ھۊنیێکا بېسارانی:
*چراغ قوربانەن، قوربان نېیەنان
غەیر پەی تۊ پەی کەس قوربان نېیەنان
*چراغم بە چین، چراغم بە چین
ئەر چینی زوڵفت بڎەو بە ماچین
*چراغم شەندی، چراغم شەندی
تۊ توخمی هېجران وە بەختم شەندی
*چراغم بۍ تۊ گوڵانی وەهار
مەیان وە دیڎەم چۇن نەشتە هەزار
*چراغ یانۍ چېش، چراغ یانۍ چېش
ئی چەم ئېشانە پەی تۊ یانۍ چېش
*چراغم شەهید، چراغم شەهید
وەختێ وەنیگات مەکەریم شەهید
* سەرنج : ئانۍ کە ھەسارەشا ۋەرو دەمینە نریانەرە، سەردېڕۍ کۊمەڵېۋ چە ھۊنێکا بېسارانی ھەنۍ
[1]