ڕوجیار لاو میترائییەکاوە پیروزەن:

بە پاو یاوانە، هەم باوەڕو میترائییەکا، ڕوجیار پیروزەن، ڕوجیار لاشاوە خوڎا نېیەن، بەڵام ماچان خوڎا ئینا پەشتەو ڕوجیاریۆ، پەوکەی پیروزەن، ڕوانە دوۍ جار قلورۍ(کڕنووش)ەش پەی بەران، شوکرانەو وېشا پەی میترای نیشانە مڎان، جە دوۍ وەختېنە کڕنووشە بەران:
1.سەحەر، وەڵۍ زیای ڕوجیاری.
2.وېرەگا، وەڵۍ نیشتەی ڕوجیاری.
یەکەمین ڕانموونی ئایینو میترایی پەی پاڕەویکاراش سەردەمو وېشەنە، ئاشنا کەردەیشان بېیەن بە جورەکا چەکی و چەنی سوود وەرگېرتەی چەنەشان، ئا چەکېچە(شمشېر، تیرە، گورز)، هەم سوود وەرگېرتەی جە(قەڵغان)ی پەی وېپارېزنای جە چەکو دژمەنی.
چېرو ڕوشنایی نویسیایێ (مانەوی) کە جە تورکمانستان ئېزیانۆ ماچان: وەراوەر بە (میترا)ی هەرەقەتینی، (میترا)ی دروزن بېیەن، گوایا سوارو (گاوێ) بېیەن و وېش بە کوڕی هەرەقەتینو خوڎای ئەشناسان، فەرمانش دان بە خەڵکی پەرساش، هەمان میترای دروزن جە ڕازە دینییەکا مەسیحیەکانە دوەبارە بېیەنۆ، پانەی کەسایەتیێ بېیەن بە نامۍ(عیسای ناصری) یاگۍ(میهر مەسیحا)وېش نمایېش کەردەن، بەڵام (میهر مەسیحا- میهر سۆشیانس) هەمان (حەزرەتو عیسای کوڕو مریەمېن)(خ.ڕ).
پاڕەوەکۍ ئایینو میترائیزمی سەردەمو وېشانە تەمامو ڕاوڕەسمە دینییەکېشا دلۍ مەڕەکانە جابەجا کەردېنۍ، پەرسگاکېشا نزیک جە سەرچەمەو ئاوۍ و ڕوخانەکانە وەشکەردېنۍ، یۊ جە شاهېڎەکا سەردەمو کۊنی کە هەشتا ساڵۍ وەڵ جە حەزرەتو مەسیحی(س.خ) ژیوان، دەربارەو(میترا)ی پېسەش واتەن:
(خوڎێوە چېرو تەوەنەو مەڕەکا ئیرانینە نیشتەبېرە، سەرزەنگۊڵېش ئامېز گېرتېنۍ، شاخەکا سەرەیش هۊرسووڕنۍ پیلا و پۆلارە).
فرەو ئا سەرچەما باسشان جە (میترائیزم)ی کەردەن سەرو ئانەیە کۊکېنۍ، کە گەشەکەردەیش بە خېرایی چا ڕوژگارانە، مەگېڵووە پەی ڕەفتار پاکی و کەردە خاسی شۊنکۆتەکاشا.[1]