#ئاکۆ مارانی#

چە زۋانی هۆرامینە هەرپاسە، کە (خاتۇنە) نامۍ ژەنېنە، (خان) نامۊ پېیاینە. هامکاتیچ کوڵکریاو هەر دۋۍ لەقەبېنۍ (Title)ېنۍ پەی ژەن و پېیای.
بەڵام ۋەرو ئانەیە، کە هامکات چە زۋانی هۆرامینە (یاگۊ ئەۋەمەنەی کارۋان-وڵاخا / هوتێلو وڵاخا)چ هەر (خان) ماچیۊ، ناچار (خان) پېسەو نامۍ (حەمە/محەمەد) پېسەو ۋەڵگری سەرۋزیان و پەی زېیاڎ کریان.
چە ئارۊنە فرە جارۍ چە نەزانییۆ بە هۆرامی و سۆرانی پەی پېیای جېیاتی (سید/ ئاقا / Mr) ... (بەڕێز) بەکاربریۊ و پەی ژەنۍ (خاتۇ) بەکاربریۊ، کە ئەر کەمېۋ هەستەوەرانە سەرنج بڎەیمۍ، پەی ئېمە بەرگنۊ، کە ئانە بېڕێز نیشاندای ژەنۍ بەرمشۊ!
ۋەرو چېشی:
بەڕێز فڵانەکەس
خاتۇ فڵانەکەسە
بەدڵېیایی (خاتۇ) بېڕێزی نېیا، بەڵام کاتېۋ لەقەبەکۍ دۋۍ جۊرۍ و دۋۍ ئاستۍ جېیاۋازېنە بەکاربریا، گەرەکما بۊ، یان نا، ناجۊری هەنۍ و ۋاتێ تەرۍ کولتۇرییۍ بەخشا.
هەڵبەتە، من ئانەیچە مزانۇ، کە کەسانېۋۍ فرە کەمۍ(بەڕێز) و (بەڕێزە) بەکاربەرا و پەی من ئانەیچە ڕۊشن هەن، کە قسەکەرڎەی سۆرانییەنە (خان) پېسە هامۋاتاو (خاتۇ)ی پەی ژەنۍ بەکاربریۊ و قسەکەرڎەی هۆرامینە بېژگە ۋاتا نەرېنییەکېش (هوتێلۊ وڵاخا)، (خان) چە ئاستی تەرەنە پەی تایتڵو دەسەڵاتداری بەکاربریان و هاماتېچ هەرپاسە کە (خاتۇنە) نامۍ ژەنانېنە، (خان) نامۍ پېیایانېنە.
ئەر ئېمە سەرنج بڎەیمۍ پەی ژەنۍ نامەکۍ (خاتۇنە) و لەقەبەکە (خاتۇ) هەن، ۋاتا مېیانو نامەکۍ و لەقەبەکەینە جېیاۋازی هەن، هەرپاسە پەی پېیایچ پەنەۋاز کەرۊ جېیاۋازیېۋ بۊ:
(حەمەخان) نامەکۍ، (خان/خا) لەقەبەکە کاتېۋ کە دمایی نامېنە بێۋ (مەحمۇڎ خان)، بەڵام کاتېۋ کە پېسەو (خاتۇ) ۋەڵۍ نامەکېنە بێۋ، پەنەۋاز کەرۊ پی جۊرە بۊ (خا مەحمۇڎ).
بە پەلۋاو من سەرو ئا بنەما تارېخیی و زۋانەۋانییا، کریۊ ئېمە چە قسەکەرڎەی و نامەی فەرمیی و بوارەکا میدیاینە چ هۆرامی و چ سۆرانی (خاتۇ ... ) جېیاتی (سیدە/ خانم / Madam)ی و ( خا ... ) جېیاتی (سید/ آقا / Mr) بەکاربەرمۍ، یان ئەر (بەڕێز: کۊزاڎ بارامی) بەکاربەرمۍ، مشیۊ پەی ژەنېچ (بەڕێزە: مەنیجە بارامی) بەکاربەرمۍ
[1]