#میرزای لوڕستانی#

جوفتیار واتش مودەعای کۊتەن
ئی جوفتە جوفت جزیر و بۆتەن
خاسەی خاتۇ زین ھەمشیرەی ئەمیر
باشی نازداران شۊخی بۍ نەزیر
واتش ڕاست واچە بە عەشق داوەر
جە ڕۇی ڕاستی ئېختلات مەکەر
قەسەم ئەو یادکەرد جوفتیاری فەقیر
یارای ئېختلات نەدارۇن ئەمیر
دەردەم گېڵاوە بەنگین باز نەڕاﮪ
ئاما بە خدمەت ئەمیری ھېجاﮪ
واتش مزگانی ئەی شاهی عادڵ
مرادی خەیرت جە سەر بی حاسڵ
جوفتی بۆتانان بزانە یەقین
بە مەردی جوفتیار ھەزار ئافەرین
ئەمیر ئین ئەژنی خەیلێ بی وەشحاڵ
شوکرش کەرد بە زات بەنای بۍ زەواڵ
سوار بی دەردەم ئەمیری نامدار
ڕۇکەرد ئەو جانب جوفتیاری ھەژار
دۇبارە ئەمیر پورسا ئەخبارات
وات جوفت زینەن ئەی شېری پوڕ زات
ئەمیر وات بەنگین شۊخی دوڵاوەر
بەرئاوەر نە جیب دۇ سێ چنگە زەڕ
بکەر وە نسار مەردی ڕیش سفید
چۇنکە بەی تەورە دادمان نەوید
بەرئاوەرد سێ چنگ جە زەڕ و جە سیم
کەردش ئەو نسار جوفتیاری قەدیم
جوفتیار چۇن دیش دوعای خێر وانا
حەمد خوداوەندی مەجید کېیانا
ئەمیر وات ئەی پیر دۇرینەی دەوران
حەرفێ مەواچۇن ڕاست واچە عەیان
ئەر من داخڵ بۇن وە شەھر بۆتان
جە کامین یانە ببۊ نان مېھمان
ئاما بەجواب ئەو پیری کامڵ
واتش ئەی جەوان فەرزانە و عاقڵ
ئەر خواھش داری کارت بۊ مەیسەر
جە خانەی بەکر پا فرۇد ئاوەر
مەردی ھۊشیار ساحېب زوبانەن
ھەر کاروبارێ جە لاش ئاسانەن
ئەر پوشت و قۇەت ماچی تاجدینەن
دامادی ئەحباب ئەمیر زیندینەن
ئەمیر چۇن جە پیر شنەفت ئی خەبەر
چەنی بەنگینە ڕاکەش گېرت نە وەر
فەرسەخێ ئەسپان ڕانان وە زەرۇر
شەھر بۆتیان دېیاردا جە دۇر
ئەمیر دېیا دیش شەماڵەی شەبگیر
مەدۊ نە دەماغ گا گا بۊی عەبیر
ڕایحەی وەش بۊی بیلادی یارش
ساوا نە دەماغ بەرشی ئازارش
مەلەک ڕەیحان نام مەکار و عەیار
شوستوشۊش مەکەرد جە پائینی شار
دوختی بەکر بۍ خەیلێ جادۇکار
جەوش مەڕانا ئەو نە ڕۇی دیوار
دیش کە دۇ سوار چۇن بەدری مونیر
پوڕ حوسن و جەماڵ تەمام بۍ نەزیر
چۇن دیشان وە چەم جە وېش بی تەباﮪ
سەری ڕاشان گېرت قەڵاشی دونیاﮪ
[1]