باخچێوە بېگەرد
نویستەی: میرزا ئۆلقاڎرو پاوەی
بەشۍ: نەوەڎهەمە

دمای تەکلیفێ فرەو (حەلیم)ۍ، ئەڎای دوەمەو محەمەڎی، جە (ئامینۍ و عەبدولموتەلیب)ی، دیسان محەمەدش چەنی وېش بەردۆ پەی مەدینەی، چاگە محەمەد هەواڵو دوە شوانەکەیش پەرسا، ماچۊ: منیچ حەزکەروون بلوون چەنیشان پەی شوانی، حەلیمېچ ماچۊ: سەرو چەما، با وېرەگا بەیاوە پەنەشان ماچوو.
جە لای ئامینە، وېشان گوزەر کەرد
تەشریفی حەزرەت، هەم چەنی وېش بەرد
تا یاوان، بە شاڎ، وە ماوای وېشان
وەزیفەی ساڵان، هەر دریا پېشان
چەو دەم محەمەد، شای بوڵند ئیقباڵ
عومری شەریفش، یاوا، وە سێ ساڵ
دوو نەفەر ئیخوان، ڕیزاعی هەم داشت
مەشیی وە سەحرا، هەر سوبح، تا بە چاشت
بە عەزمی نیاز حەیوان چڕانی
نە شەوان، نە ماڵ، بە ڕوژ، شوانی
حەزرەت، بەو خلعەت، کەس نەدارەوە
بەو لەفزی شیرین، شەکەر بارەوە
پەرسا، جە دایە، کۊن برادەران
دیارشان نېیەن، یە وە کۊ مەشان
حەلیمە واتش: ڕوحم فیدات بۊ
برادەرانت، ها نە سەحرا و کۊ
مەشغووڵەن، بە کار حەیوان چڕانی
بە شەو هان نە ماڵ، بە ڕۊ، شوانی
فەرما، تۊ پەی چېش منیچ نەکیانای
من چەنی ئەوان، تەفاوت زانای
حەلیمە واتش: وە بانی دیڎەم
سەبای، تۊچ بشۊ، ئەی نووری دیڎەم
چوون عەلا ، سەباح، سەرەش شانە کەرد
پرچی موشکینش دانە دانە کەرد
دیڎەی شەهبازش ڕەشت بە سورمەی توور
خېزا جە تەلعەت، دیبای کۊ کۊی نوور
لیباسی ئەعلا، پۊشا، بە قامەت
پەرێ ئەو قامەت، خېزا قیامەت
پەی وەقعی نەزەر عەینی بەڎکاران
یەک گەردەن بەندیی، ڕووی ڕوزگاران
گرد لەعلی یومن، فەیروزەکانی
جوزئی تەلیسمات، چوون نەقشی جانی
دەسش نە گەردەن، مینای محەمەد
پەخش بیی قامەت، ڕەعنای محەمەد
جە ناگاه دەس بەرد شای تاج لەولاک
جە وېش کەردەوە، هەوا دا نەخاک
وات: ئەو کەس نیگاه دارەندەی منەن
ڕەحمەت بۍ پایان، عەتاش عەزیمەن
نیگاه مەدارۊ، وەجه ئەلتافی وېش
جە قەوڵوان و قەوڵ، گەردەن بەندم چېش
تەشریف بەرد، وەشیی، وەبۍ مدارا
چەنی ئیخوانان، ڕوو کەرد وە سارا
حەلیم، وەسیەت کەرد ئەو بە فەرزەندان
خەیلێ لاڵە کەرد، بەو ئەرامەندان
واتش: دەخیلم جە سەحرا و جە کۊ
ئارۊ ئاگاتان، جە محەمەڎ بۊ.[1]