جە شارەکێ مەریوانی و #پاوە#ی یۆھەمین ساڵڕۆ ئەرەمەرزنانی ڕێکوزیاو یانەو ژەناو ھۆرامانی (یەرەژە) پیرۆز کریا.
جە شارەکێ مەریوانی و پاوەی جە دوێ مەڕاسیمێ جیاوازێنە، یۆھەمین ساڵڕۆ ئەرەمەرزنانی ڕێکوزیاو یانەو ژەناو ھۆرامانی (یەرەژە) بە دروشمەو ژەنی سەرچەمەو ژیوایەنە و بەبێ ئازادی ژەنێ ژیوای ماناش نییەنە پیرۆز کریا.
جە هەر #14-09-2020# مەراسیمەکێنە، سەرەڕاو نەوەشی کۆرۆنای، دەیان ئەندامێ ڕێکوزیاکەی و ژەنە چالاکوانێ مەریوانی و پاوەی ئامادێ بیێ و جە میانشانە سەرنج کێشیا سەرو هەرمانێ و چالاکیێ و کۆشایشو یانەو ژەنا هەورامانی و یانەکە و ئەندامەکێش ستاییش و سپاسگوزاری کریێ.
هەر جە مەراسیمەکانە چەنڎین وتارێ دریێ و پێشکەشێ کریێ کە سەرجەمشان باس جە گرنگی ڕۆڵ و کۆشای ژەنێ بەگردیی و یانەو ژەناو ھۆرامانی (یەرەژە) بەتایبەتی مەکەرێنێ جە هۆشیارکەردەی و وڵێوستەی گلێرگەی و یاونایش بە ئازادی. هاموەخت باس جە ئانەیە کریا کە ژەنی سەرچەمەو ژیوایەنە و بەبێ ئازدی ژەنێ ژیوای ماناش نییەنە و هەرگیز گلێرگە بە ژەنی و پیاشەوە ئازاد نمەبۆنە.
هەرپاسە داوا جە ژەنا هەورامانی بە تایبەتی و وەرهۆرزو کوردستانی بە گردی کریا، تا کارا تەر و فراوان تەر جە ویەردەی بەشدارێ کار و خەباتی و چالاکیەکان ببانێ و پەی چارەسەری گرفتە کۆمەڵایەتیەکان و پارێزنای زوان، هونەر، فەرهەنک و تاریخو هەورامانی پێشەنگی بکەرانێ.
یاگێ یادئاوەرییەن، کە ساڵێو جەی وەڵتەر و جە 14و سپتەمبەرو ساڵەو 2019یەنە، بە بەشداری جەمێ جە ژەنە چالاکوانەکێ هەرێمو هەورامانی، ڕێکوزیاو یانەو ژەناو ھۆرامانی (یەرەژە) مەرزیارە و جە ئاوەختەوە و تا بە ئیسە، ڕێکوزیاکە دەیان چالاکیێ جۆر بەجۆرێ مەدەنیێش جە شارێ و ناوچەکێ هەورامانی و وەرهۆرز کوردستانیەنە ئەنجامێ دێنێ و ڕێزش نیان جە چەنڎین کەسایەتیێ هەورامانی. هامکات ڕێکوزیاکە بییەن بە یاگێ ئومێدی پەی ژەناو هەورامانی و سات بەسات ژەنی زیاتەرێ پەیوەستێش مەبانێ و هۆکارو ئانەیە ئانە کە ژەنەکێ بەدیئامای هیوێ، ئاواتێ و ئامانجەکێ وێشان دلێ ڕێکوزیاکەیەنە مەوینانێوە.[1]