نووسینی: #محەمەد هەریری#
چاپی ئەلکترۆنی یەکەم: نۆڤەمبەری 2019
دیزاینی بەرگ و ناواخن: هادی هونەر
پووختەیەک:
فەرەج فۆدە کەسێکی هەستیار بوو لەناو نێوەندێک لە هیستریای دینی، دەیزانی ئەو هیستریایە دینیە بە کۆمەڵە وڵاتەکەی بەرەو چ کارەساتێک دەبات، لە هەندێ لە پێشبینییەکانی فۆدە دەتوانی هەموو تووندوتیژیەکانی قاعیدە و داعش بدۆزیتەوە، کە چۆن فۆدە پێشبینی کردووە.
بەڵام فۆدە هەر موعاناتی لە دەست ئیخوان وئیسلامییەکان نەبوو، بەڵکو بە دەست حزبە بەناو عەلمانیەکان و دەسەڵاتی عەلمانیش دەیناڵاند، کە لەبەر گەندەڵیان زۆر یاریدەدەر بوون بۆ دەرکەوتن وبەهێزبوونی ئیسلامی سیاسی و دەستگرتن بەسەر گۆڕەپانەکە.
دیاردەی ڕاستگۆیی و ئەستۆ پاکی فەرەج فۆدە، هێندە گەورە بوو، نیگەرانی خستبووە دلی سەرتاسەری ئیسلامییەکان، بە ئیسلامی حکومیشەوە، جونکە ئەزهەر و شەعراوی ومحمد غەزالی نزیک لە حکومەتیش دژایەتیان دەکرد بەر لە ئیخوان و الجماعة الاسلامیة و جماعة الجهاد و باقی توندڕەوەکانی تر. بۆیە بەرلەوەی حزبەکانی ئیسلامی سیاسی فەتوای کوشتنی بدەن، احمد مەزروعەی جێگری سەرۆکی بەرەی زانایانی ئەزهەر فەتوای تەکفیر و هەڵگەڕانەوەیان دا!
بەو شێوەیە ئیسلامی سیاسی بە عمر عبدالرحمن و سەڵاح ئیسماعیلی جیهادی و بەناو ئیخوانە میانڕەوەکان، لەگەڵ ئیسلامی ڕەسمی حکومی بە ئەزهەر و غەزالی وشەعراویش، هەماهەنگ بوون و گەلەکۆمەیان لێکرد، نەیانتوانی بەرگەی فیکری فەرەج فۆدە بگرن، و وەڵامی دەنەوە بە وشە، لە جیاتی چەندین گەمژەی ساویلکەی دینیان فریودا بە گوللە وەڵامی فۆدەی شەهید بدەنەوە.
فەرەج فۆدە هەموو ئامانجی پێکەوە ژیان و دەوڵەتی هاوڵاتی بێ فەرق وجیاوازی، و نیشتیمانێکی دیموکراتی و پێشکەوتوخواز بوو.
کاتێ لە خوێندنەوەی ئەو کتێبە دەبیتەوە، مەگەر بڕیاری پێشوەختەت دابێ، دەنا دەگەیتە قەناعەتی تەواو، کە ئەوەی پێی دەگووترێت ئیسلامی میانڕەو تەنها وەهم و ئەفسانەیە. چونکە کەسێکیان لەوپەڕی میانڕەویەوە تا ئەوپەری تووندڕەویەوە نەیانگووت، ئەو کابرایە نابێ تەکفیر بکرێ، ونابێ بکوژرێ و فەتوای کوشتنی بدرێ. هەموویان بەژداربوون لە ڕشتنی خوێنی فەرەج فۆدەی مەزن.