دواڕۆژ، عەلی حەمە سەعید
لەماوەی چوار ڕۆژی جەژنی قورباندا و لە کۆی 32 شوێنی گەشتیاری سنوری پارێزگای هەڵەبجە زیاتر لە 60 هەزار گەشتیار ڕوویان لە ناوچەکە کردوە، هاوکات قەزای شارەزوریش زۆرترین قوربانی ڕووداوەکانی هاتوچۆی تیادا تۆمارکرداوە کە 16 قوربانی بوون.
بەگوێرەی ئەو ئامارانەی کە لە دامودەزگاکانی سنوری پارێزگای هەڵەبجەوە دەست دواڕۆژ کەوتوون ئەوە خراوەتەڕوو "لە جەژنی قوربانی ئەمساڵدا بە بەراورد بە جەژنی قوربانی ساڵی ڕابردوو جەژنی ڕەمەزانی ئەمساڵیش هاتنی گەشتیاران بۆ ناوچەکە بەڕێژەکی بەرچاو زیادیان کردوە، بەجۆرێک کە تەنها لە ماوەی چوار ڕۆژی ئەم جەژنەدا زیاتر لە 60 هەزار گەشتیار ڕوویان لە 32 جێگای گەشتیاری هەڵەبجە کردوە".
ئەوەش ڕونکراوەتەوە "لە %80ی گەشتیارەکان ڕویان لە سەیرانگای ئاوێسەر لە شارۆچکەی تەوێڵە و هاوینە هەواری ئەحمەد ئاوا و سەرچاوەی زەڵم لە ناحیەی خورماڵ کردوە، هاوکات بەشێکی زۆری گەشتیارانیش ڕویان لە سەریرانگای چاوگ کردووە لە ناوەندی هەڵەبجەدا".
هەر بە گوێرەی ئامارەکان، زیاتر لە %50 گەشتیارەکانی سنوری پارێزگای هەڵەبجە گەشتیارانی پارێزگاکانی ناوەڕاست و باشوری عێراق و گەشتیارانی ڕۆژهەڵاتی کوردستان بوون.
لەلایەکی ترەوە، بەگوێرەی ئەو ئامارانەی لە نەخۆشخانە و مەڵبەندە تەندروستیەکانی شارەزوور و سەیدساقەوە بە دواڕۆژ دراون ئەوە ڕاگەیەنراوە کە زۆرترین قوربانیەکانی ڕووداوەکانی هاتوچۆ لە سنوری قەزای شارەزوور و سەیدسادقدا تۆمار کراون بەجۆرێک کە سێ ڕووداوی هاتوچۆ تۆمار کراون بەو هۆیەشەوە هەشت کەس گیانیان لەدەستداوە و هەشتی دیکەش بریندار بوون.
ئەوەش خراوەتەڕوو "تەنها لە نەخۆشخانەی گشتی شەهید شەوکەتی حاجی موشیر لە قەزای سەیدسادق لەماوەی چوار ڕۆژی جەژندا زیاتر لە 400 نەخۆش سەردانی نەخۆشخانەکەیان کردوە هەروەها 16 حاڵەتی برینداری جۆرا و جۆ تۆمار کراون، هاوکات 104 نەخۆشیش خەوێنراون".
- 16-09-2016