ساڵی 1922 لە شاری #هەولێر# لە بنەماڵەیەکی ناودار هاتۆتە دنیاوە. ساڵی 1943 کۆلیژی مافی لە زانکۆی بەغدا تەواوکردووە. هەر ئەو ماوەیەش گەلێ بابەت و نووسینی هەمە جۆری لە ڕۆژنامە و گۆڤارەکانی بەغدا بڵاوکردووەتەوە. ساڵی 1945 وازی لە کاری پارێزەری هێناوەو بە مودیریشارەدێ لە خورماڵ و بازیان و قەرەداغ و لەیلان و حەویجەو چەند شوێنێکی تر خزمەتی کردووە. ساڵی 1954 کراوە بە قائیمقامی زێبار و دواتر لەم پۆستەدا لە #قەڵادزێ# و کۆیە درێژەی بەکاری وەزیفی خۆی داوە تا ساڵی 1958. لە مانگی ئابی ساڵی 1958 کراوە بە سەرۆکی شارەوانی هەولێر. پاش ماوەیەک لە #سلێمانی# موتەسەریف بووە بەوەکالەت و سەرەتای ساڵی 1959 گوێزراوەتەوە بۆ دیوانی #وەزارەتی ناوخۆ# و پلە بە پلە بەرزبووەتەوە تا بووە بە وەکیلی وەزیری ناوخۆ. پاش کودەتاکەی ساڵی 1963 زیندانی کراوە و ماوەی ساڵێک لە زینداندا مایەوە.دوای ئازاد بوونی یەکسەر خانەنشین کراوە و گەڕایەوە سەرکاری پارێزەری. ساڵی 1967 کراوە بە ئەندامی دەستەی بەڕێوەبردنی نەقابەی پارێزەرانی ئێراق و لە گەشتێکیدا بۆ بەشداریکردن لە کۆنگرەی نۆیەمی پارێزەرانی عەرەب، سەردانی قاهیرەی کرد و لەوێ سەبارەت بە کێشەی کورد یاداشتێکی پێشکەشی خوالێخۆشبووجەمال عەبدولناسر کرد. ساڵی 1971 کراوە بە ئەندامی کۆمەڵەی ڕۆشنبیری کورد لە بەغدا. ئەم مامۆستا تێکۆشەرە، نووسەرێکی بەتواناو شارەزا بوو، لە بوارەکانی یاسا و ڕۆشنبیری گشتیدا زیاتر لە (20) پەرتووکی نووسیوە و ساڵی 1996 کۆچی دوایی کردووە.