باخچێوە بېگەرد
نویستەی: میرزا ئۆلقاڎرو پاوەی
بەشۍ ویس و پەنجەمە
دمای شاڎبیەیۆ ئاڎەمی و حەوێ بە یۊترینی، جوبرەئیل پەی لایشا ئامان، پەنەشا ماچۊ: خوڎای گۆرەی فەرماوان مادام ئاڎۍ سەبرشان گېرت و بە بەشەو من سابیرۍ بیۍ، جە پاداشتو ئانەینە ئاڎەمم کەردم بە یەکەم پېخامئاوەرو سەرو زەمینۍ، ئینجا پېخامەکەش تەسلیمو ئاڎەمی کەرد:
ناگا جوبرەئیل، پەیدا بیی، جەو دەم
موژدەی ڕیسالەت، ئاوەرد پەی ئادەم
حەقق فەرما؛ چوون ئەو سابر بی جە دەرد
بەخشام گوناهش، تۊبەم قبووڵ کەرد
ئەولادش جە لام خەیلێ مەقبوولەن
سەد و ویست و چوار، هەزار ڕەسوولەن
محەمەد، خاتەمی ئەنبیاهانەن
خاک و پاش، تەمام تاجی شاهانەن
حەبیبی مەحبووب، دانای داوەرەن
شەفیعی دیوان، یەومی مەحشەرەن
چونکە پېغەمبەر، ئاخر زەمانەن
باعیسی ئیجاد، کەون و مەکانەن
هەر جە ڕووی ئەزەڵ، خەڵقیان جە نوور
بەڵام جە ئاخر، مەکەرۊ، زوهوور
ئەسڵش جە نوورەن، نەسلی تۊ مەبۊ
عالەم وېنەی کا، ئەو چوون کۊه مەبۊ
ئەحمەد و مەحموود، ئیسم و مەقامش
جە لای نامی وېم، نویسیان نامش
بەڵام ئەی ئادەم، بواچوون پېتان
مەشغووڵ بین، بەکار، زیندەگی وېتان
دانای فەزیلەت، شای کەرەم بۍ شۊ
دەوری دنیای دوون، گرد بەخشام بە تۊ
بەختت بڵندەن، تەختت، ئامادەن
خوڎا، هەزار ساڵ، عومرش پېت دادەن
ئەمری داوەرەن، من و تۊ، بە هەم
بڕیزیم بینای، کەعبەی موعەززەم
[1]