پۊختێوە جە تاریخو هۆرامانی و سرووشتو ژیوای خەڵکەکەیش
بەشۍ: ویس و چوارەمە
نویستەی: #ئیبراهیم میکە عەلی#
کوڵە باسێوە بارەو مەحمووڎ خانو دزڵییٛ و سەردەمەکەیشۆ
هەرچی وچیوٙ بارەو مەحمود خانو دزڵییٛوە هەڵای کەما و نمەتاومیٛ حەقو ویٛش بدەیمیٛ پەنە وەلێم ئیٛمە هەکە قەرارما ئانەن پوختێوە وزمیٛ ڕوە ئیٛتر گلەییٛما ناستیٛنیٛ سەرو ویٛماوە و چیٛگەنە ئەشوٙم کەم پیٛسە دەلاقێوە تەماشە کریوٙ هەکە ڕوەو فرەیرە کریوٙوە .
مەحمود خان ئا کەسەبیٛ هەکە بە سمیٛ ئەسپەکاش و ڕمیٛ دەسو جەنگاوەرەکاش ئا مەرزیٛشە پاشیٛلیٛ کەردیٛ هەکە داگیرکەرا وەڵاتی کیٛشتیٛبیٛنیٛ.
مەحمود خان ساڵەو (1870)ی عیسایینە دەگاو دزڵییٛنە و دلیٛ یانێوە خانەڎانینە جە ئەڎێ بېیەن.
مەحمود خان کوڕو عەزیز خان کوڕو بارام بەگین، ئەڎایچش کناچیٛ حەسەن سان کوڕو حەمە سوڵتانو شەمیانینە، ئی حەسەن سانە ساڵەو (1284) کوٙچی بە فیتو موعتەمەدولدەولەی کوشېیان، چوونکوم ملش نەڎان پەنە.
دەگاو دزڵییٛچ گنوٙ دیمو وەرکەوتو کەشو داڵانی و سەرو مەرزو ئیسەو میانو ئیٛرانی و ئیٛراقی و دیمو ئیٛراقیۆ دەگاو زەڵمی نزیکتەرین دەگانە جە دزڵییٛوە.
مەحمود خان ژیوایشەنە شش ژەنیش ئاردیٛنیٛ و جە گردو ژەنەکاش (11) کوڕیٛ و (6) کناچیٛش بییٛنیٛ .
سەرەتاو ساڵەو (1946) عیسایینە حکومەتو حەمەڕەزا شای داواو وات و واچی کەروٙ جە مەحمود خانی و خانیچ وەرو پەروٙشیش پەی ئاوەڎانی وەڵاتی ملوٙ سەردەمو داواکیٛ دەوڵەتو ئیٛرانیۆ و کەلو مڵەوەردیٛ چەنی ئەفسەرێوە ئیٛرانی نیشوٙرە، پیٛسەو کسمو داگیرکەرا ئا جارەیچە بە خیانەت خان زەهروارد کریوٙ و دمای گیٛڵایشۆ دیمو ئیٛراقیرە، دمای دە ڕوا بە کاریگەریی زەهرەکەی وەفات کەروٙنە و دەگاو هانەوقوڵی ئەسپەردەو خاکی کریوٙ و ئیسە مەزارش حەر ئینا بەرزایېوە پەشتەو دەگاو هانەو قوڵیۆ.[1]