جەماوەری بەشەرەفی کوردستان
کەسوکاری سەربەرزی شەهیدان
بیست و حەوت ساڵ لەمەوبەر لەسەر بانگهێشت و بە چاوساغی سەرکردایەتی پارتی دیموکراتی کوردستان، هێزەکانی گاردی کۆماریی رژێمی دیکتاتۆری بەعس شاری هەولێری پایتەختی کوردستان و پایتەختی خەونی ئازادی و ناوەندی دامەزراوە سەروەرییەکانی وڵاتەکەمانیان داگیرکرد و زیانێکی کوشندە و جەرگبڕیان لە ماناکانی نەتەوەیی و نیشتمانپەروەری دا کە هەرگیزا و هەرگیز لە بیر ناچنەوە.
هەمووی پێنج ساڵ بوو کۆمەڵانی خەڵکی کوردستان بەسەر زوڵم و زۆرداریی رژێمی بەعسدا راپەڕیبوون و بەشێکی خاکی نیشمانیان لە چنگ دەرهێنابوون، کەچی پارتی بە بیانووی پڕوپووچی تێکچوونی باڵانسی هێزەکان لە شەڕی ناوخۆ، جارێکی تر ئه و سوپاى ئەنفال و کیمیابارانەیان هێنایەوە سەر خاکی کوردستان و شاری هەولێر، کە سەدان پێشمەرگە و تێکۆشەری یەکێتیی نیشتمانیی کوردستان و هێزەکانی ئۆپۆزسیۆنی عیراقی شەهید و بریندار کرد، سەدانیان بەدیل گیران و بێسەر و شوێن کران و دەبابەکانی ئه و سوپا شۆفێنییە شکۆی پارلەمانی هەڵبژێردراوی خەڵکی کوردستانی شکاند و ئەزموونەکەمانیان، لە سەرەتای پێکهاتنییەوە، لەکەدارکرد.
هەرچەندە ئەم خیانەتە وەک زۆر ناپاکی تری مێژووی ئەم حزبە لە یادەوەری میللەتەکەماندا پەڵەیەکی رەشی قەترانییە و بەسەدان پاکانەی خیتابی ئیعلامی و کتێبی ناڕاست و گێڕانەوەی چەواشەکاری رووداوەکان ناسڕدرێتەوە، بەڵام یەکێتیی نیشتمانیی کوردستان و هێزە سیاسییە دەربەستەکانی کوردستان، پاڵپشت به و ئومێدەی بە ئایندەی گەلەکەمان و رەوایی و مەسەلەی کورد هەیانە، پاڵپشت بەوەی ناکرێت پڕۆسەی سیاسی وڵاتەکەمان لە شوێنێکدا چەق ببەستێت و پەکی بخرێت، بۆیە تێکڕا قەدەری باشتری ئاشتی و پێکهاتنەوەیان هەڵبژارد و بەسەر برینی ناپاکی و خیانەتدا بازیان دا و هەوڵیان خستەگەڕ بۆ پاراستنی ئەوەی ماوە لە شکۆی ئەزموونی نەتەوەکەمان، لاپەڕەیەکی تازەیان بۆ ئاشتی و تێهەڵچوونەوەی خەباتى دیموکراتى هەڵدایەوە. روخانی سوپاى رژێمی هاوکارى کارەساتی 31ی ئاب لە پڕۆسەی ئازادی و هەروەها هەرچی دەسکەوتی گەلەکەمان هەیە، لە دانپیانانى دەستووریی بە هەرێمى کوردستان و سیستمى فیدراڵى بەرهەمی دانبەخۆداگرتنی یەکێتیی نیشتمانیی کوردستان و پەرۆشی نیشتمانپەروەرانەیە
بۆ دواڕۆژی کوردایەتی و سەروەری کوردستان.
بەڵام بە داخەوە ئه و هێزەی بەرپرسە لە خیانەتی 31ی ئاب، لەجیاتی دەرس وەرگرتن لە رووداوەکانی مێژوو، لەسەر هەمان سیاسەتی چەوتی بەردەوامە و تازە بە تازە، بەهەمان نەفەسی تەسکی بەرژەوەندی پارتێتیەوە، ئاگری ناکۆکی و ناپاکی خۆش دەکات کە دیارە بەهەڵە لە دانبەخۆداگرتن و سەبری هۆشیارانەی دەربەستانی ئایندەی کوردستان تێگەیشتووە، بۆیە وا ئێستاش بە تۆمەت داتاشین و تەشهیری بێبنەما بۆ هێزە نیشتمانپەروەرەکان، لەسەرووی هەمووشیانەوە بۆ یەکێتیی نیشتمانیی کوردستان، یادەوەری تیژی مێژوو تاقیدەکاتەوە، پارە و پاوەر و تەزویری میدیایى بێشومارى بۆ ئەم چەواشەکارییە خستۆتەگەڕ، لە جیاتی ئەوەی هەوڵبدات بە یەکجاری برینەکانی مێژووی خیانەت ساڕێژ بکات و بە سیاسەتی دروستی کوردستانی و نەتەوەیی ئه و لاپەڕە رەشە لە مێژووی خۆی و کوردستان بسڕێتەوە، کەچی هەمیشە لە هەوڵی شەرعیەتپێدانی چەواشەکارانەی ئه و خیانەتەدایە و بێباکانە مامەڵە لەگەڵ پڕۆسەی سیاسی و ئایندەی گەلەکەماندا دەکات.
کۆمەڵانى خەڵکى کوردستان
لەم یادە تاڵەدا ئێمە هەمیشە لە بری کینە بەخشینەوە و تۆڵەکردنەوە، دەمانەوێت شوێنەوار و پاشماوە خراپە دەروونی و مەعنەوییەکانی ئه و کارەساتە نەتەوەییە و گشت کارەساتەکان بە یەکجاری بسڕینەوە و بە پەرۆشەوە پێداگیری لەوە دەکەین کە ویستی خۆسەپاندن وەلا بنرێت و بژاردەی راستکردنەوەی پڕۆسەی حوکمڕانی و دیموکراسی و دادپەروەری راستەقینە لە کوردستاندا بچەسپێنرێت. بۆ ئەم سیاسەتە نیشتمانییە دروستە بە ئاگاییەوە ئامادەی خەبات و قوربانیدانین، بێ ئەوەی لە مێژووی رەشی ئابی 1996 و کەموکوڕییەکانى تر غافڵ بین.
لەیادی ئه و رۆژە رەشە و بۆ یادی هەموو شەهید و قوربانیانی گەلەکەمان، سڵاو لە سەرجەم شەهیده قارەمان و سەربەرزەکانی گەلەکەمان بەتایبەتی شەهیدە سەربەرزەکانی موقاوەمەتی داگیرکردنی پایتەختی کوردستان، لە رۆژی رەشی 31ی ئابى 1996 دا.[1]
مەکتەبی سیاسی
یەکێتیی نیشتمانیی کوردستان
تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!